الشـِـــــمر..وحرّمــلــــه..في بغداد..زهير العقابي

في زياره سريعه وغريبه استقبل السيد ....في بغداد. الوفد القادم من يزيد بن معاويه ولذي يترأسه الشمر بن ذي الجوشن وعمر بن سعد وحرمله وكان بأستقبالهم ..الساده وزير الكفر والتكفير ووزير الطائفيه ووزيرالكذب والمنافقين والساده مسؤليي اذلال الشعب العراقي....وكان مندوب الفرات حاضرا ونقل لنا ماتم تناوله في هذا اللقاء....


الشمر بن ذي الجوشن......



لا تعوفونه
مال الري وكرسي السلطه. الكلش غالي لتعوفونه


وعهد ابليس بحب الدنيا.. الخطّه عليكم لتبيعونه


شفتوني اني بيوم العاشر..واجمل ساعاتي الملعونه


شفتوا اشلون اذبح باليمه..كلب مكشر عن سنونه


وراس حسين اليلعب بيدي..وسيفي اليلعب فوك متونه


شفت الهادي..
وحاضر حيدر..
وشفت الزهره تهل الدمعه..وجبريل ينشف بعيونه


الحوراء اتصّيح. عوفه
الاطفال اتصّرخ. عوفه
وماهمني كل اليحجونه...


سحر الكرسي وياهو المثله
بالزرقاء انتو تشوفونه..



حرمله..


انه بليس بهيئة حيه..بايع اخرتي بحب دنيه

بعت اسهامي بحب السلطه..والسلطه احلامي الورديه


سهمي الاول تتذكرونه..عباس لطفيت عيونه


والثاني الماظن تنسونه..عبدالله وسهمي البمتونه


فرفح من حرورة سهمي..مد ايده وحسباله اميّه


انه بليس بهيئة حيه
بايع اخرتي بحب دنيه

والثالث من اسمه مثلث..بحسين وروحه ظل يعبث


هاي اسهامي وهاي السلطه..والرايد منكم لاينكث


حب الكرسي يحب القسوه ..ويحب اكلوب المدميه

انا بليس بهيئة حيه
بايع اخرتي بحب دنيه




وبعد ان استمع الساده المستقبلون هذه الكلمات حيث ان عمر بن سعد كان قد انشغل عن اللقاء بملاحقة النساء بنظراته الغريبه
اتفق الجميع على رأي واحد وكتبوا عهدهم الى يزيد ابن معاويه


اشلون انعوفه



وعيونك متهمنه الدمعه..ومتهمنه احنا ارواح الناس



يوميه الجثث بكل ديره..وصار الموت اجمل احساس


الله ياصورة كل طفله .. ظفرة موت بنص الراس


بكصايبها نفخخ عبوه..والدم حنه وبلونه تلون الكراس


ونزرع الغام بكل ساحه..طوبه وجثه ايصير الكاس


والجامع طابوكه ايكبّر..وبيت الله بسطل الكناس


ونكنس كل اديان العدنه..كافي انأذن كافي اجراس


ونبوك الفرحه من الوادم..واللص من نص الحراس


والنفط احنه ابوكه بخفيه..وخلي الشعب ايعيش افلاس


وخله الجوع ايركص الوادم..وخلي الشعب بذل ينداس


هذا العهد او مايتبدل ياوالينا
والمأتم يذبح الاعراس...





استلم الشمر الرساله ووعد الساده المسؤلين ايصالها بأمانه الى يزيدبن معاويه وتمنى للجميع الاستمرار في قطع الرؤوس وسفك الدماء..ثم طلب السيد........في بغداد باخلاء القاعه من المندوبين والصحفيين..سادتي اهل الفرات ..
هذا ما وصلنا وما نقله الينا مندوبنا من مكان اللقاء..نلتقيكم بخير