بسم الله الرحمن الرحيم
السلام عليكم ورحمة الله وبركاته

جلست افكر في حال العراق والعراقيين وثقافة القتل المستهجنه
وتقمصت شخصية فتاة شويخيه فقدت شقيق لها
افترضت ان اسمه مهند
وانه متزوج وله ولد اسمه حيدر وبنت اسمها تبارك
وانه قتل غدرا وظلما وعدوانا لا لذنب اقترفه وانما بحقد اعمى بصائر ضعاف النفوس
وها هو يونس الجبوري متقمصا شخصية الشويخيه



القصيده

أريد شـُـبه إســتعاره من الشــعر بيتين
تسـعفلي تالي ألگلــب عالرايـــد يگوله

ياريــت عندي بخـت ما اطالــب ببختين
والگــى مهنــد يبوســه لحيـــدر بطوله

يضــم تبــارك بلهفة شــوگ عالجنبيـن
بنتـه أحرموهـا ابوهـا ليـش هالنذولـــه

والله لــولا الغــدر كنــا احنـا في جنتـين
يخسـون ما گابلــوه ومــات بالصولــــه

باگــوه خسـه وغفــل حچايـة الوجهيـن
ثلاثيـن طلقــة حقـد في جسـمه خلولــه

وين الشـويخي الاصيـل معرّب الجديـن
ياخــذ بثــاره وانــا اتلگــاه بهلهولـــــه

والبس ثياب الفرح عگب الحزن لونين
وانــذر حياتــي لحياتــه دوم گولولـــــه

امـي تگلّـي عليـش شبيـچ بس تبچيــن
واسـكت واداري عليها الحزن بسهولـه

ادري اتـّخبـل اذا ما گلــــــت مشــتاگين
علــى مهنــد لانهـــا فيـــــه مخبولـــــه

يللـــي سمعتــو گصيــدي هذا يالطيبيـن
اشـــعل مهنــد فـــؤادي فراگه يا هولـه

أريد شـُـبه إســتعاره من الشــعر بيتين
تسـعفلي تالي ألگلــب عالرايـــد يگوله










الكناري
يونس الجبوري
24/تموز/2010