ياالهي يا أرحم الرحمين ما تخلصنا من شركة لا زين

السلام عليكم ورحمة الله وبركاته

اخواني واخواتي الاعزاء

اكيد الكل سامع بشركة لا زين mtc اثير سابقاً

اكيد اكثر العراقيين مبتلين بهذه الشركة

اكثر شركة ترسل رسائل مجانية

طبعا مجناية بس بالحجي
اذا اشتركت بوحده من الرسائل ينعل سلفه سلفاك

بعد ما تلحك تستخدم الرصيد لان الجماعه يسوون طريقه علاجيه

دولارين بلع قبل الاتصال ودولار بعد الاتصال

نص دولار قبل الترميش ونص دولار بعد الترميش

والمكرود الكارت تخليه على نص كوب ماء وتشربه وانت الممنون

نجي انشوف الرسائل الي دمرونه بيه

الرساله الاولى

انطح راسك بالحايط واحصل على 1000 دولار جذب اتصل على الرقم 3322

الرسالة الثانية

اشمر روحك من السطح واحصل على 3000 دولار فلوس الفاتحة اتصل على 2400

الرسالة الثالثة

اظرب زرك بالحمام وخل تتكسر مفاصلك بالكاشي واحصل على 500 دولار اتصل على 1234

الرسالة الرابعة

فرصة العمر تشاهد مبارات كأس العالم من ملعب الشعب اشترك واكتب اسمك واسم ابوك وامك وعنوان بيتكم وبيت الخلفوك وبيت جيرانكم اتصل على رقم 9060

الرسالة الخامسة

استبق الاخرين واحصل على 100 دولار كلاوات من حجي عطعوط الله يرحمة المتوفي 1890 م اتصل على 4443

الرسالة السادسة

تريد تعرف برجك اليوم كل ما تتصل اكثر كل ما راح يطيح حظك اكثر اتصل على 5400

الرسالة السابعة

تريد 1000 لتر بنازين اتصل على الرقم 1119 وراح توصلك ال 1000 لتر برسالة مع قوطيه دهن فوكس

الرسالة الثامنة

تريد ينهجم بيتك وبيت الخلفوك اشترك ويانه بخدمة زين سمعني واسمع ياس خضر وهو يغني جذاب دولبني الوكت اتصل على الرقم 6456

والحبل على الجرار من الرسائل التعبانه

واتحده واحد يجي يكلي ربحت من شركة زين كله جذب بجذب
ومجرد سرقة اموال المشتركين المساكين

باليوم توصلني اكثر من 10 الى 15 رساله

ادري تعرفوني شجلبتو بيه قابل اني حصن الخيضر تورطت اشتريت خط زين مو شعلتوا ابو صفحتي
حرت وين احجي والمن اشتكي
اتصلت بيكم اكثر من مرة كتلكم عمي جفوني شركم من الرسائل وماكو فايده
عاد كلت خل اكتب عليكم بالانتر نت بلكت واحد منكم يقرأ الموضوع والله يهديه عليه ويوقف خدمة الرسائل
واذا تريدون الرقم مالتي انتم تعرفونه
لان اكثر واحد مخابركم اني واكثر واحد تريدون تقشمرون عليه بالرسائل هو اني
بس والعباس ابو فاضل مااشترك وياكم بخدمة الرسائل لو تطلع براسكم نخله
وبعد سوولي اغراء برسائلكم الحلوه مال مريدي ولكم علينه
ومااريد ولا دينار منكم الله لا يعوزني عليكم حتا التجأ الى رسائلكم التعبانه واخلص فليساتي

الصبح والظهر والعصر والمغرب وبالليل ادزون رسائل ما خلصت رسائلكم

يابه مو كافي تقفيص واستحو على نفسكم

ما شبعتوا لغف وكرف

ومااوصيكم بعد اريكم تزغرون الكارت اريد الكارت اشوفه بالمجهر كوه

واريدكم تشتلون الي يخابركم اكثر من ساعتين لو مخابر رئيس امريكا هم احجي وياهه بخمس دقائق خل شويه انطير فياله
وتدرون شنو الاغنية على الانتظار فوكاهه الاغنية تشلع الكلب وتقهر
وتخليك تحس يضحكون عليك

فوك النخل

يعني الجماعه شاتلينه فوك النخل

الله يهديكم يا شركة لا زين العراقية

وكل دينار اخذتوه بالبوكه والنصب ان شاء الله رب العالمين ما يضيع حق الفقراء والناس المتورطين وياكم لكن شجابرك على المر غير الامر منه

هذا الموضوع بقلم اخوكم الزير سالم لان روحي طالعه من شركة لا زين وبوكه وجذبه وخمطه وتقفيصه شركة لا زين ام الرسائل
والكارتات الصغار
تكشط الكارت يروح الكارت والرصيد وابوك الله يرحمه

شلون نعمه هاي على العراقيين

وهسه يوزعون خطوط بلاش تعالوا بس اخذوا

تعرفون ليش يوزعون خطوط مجانيه

حتا يكثر الخمط

وعدهم
100000000000000000000000000
مااعرف شكد الرقم

بس هذا الرقم كله رسائل يريدون يوزعونه على المشتركين

يخافون تبقى على كلوبهم وتحمظ

تحياتي وتقديري

الزير سالم