السيد نوري المالكي علينه....ملينه
خمس اسنين تنهب والشعب جوعان
يانوري علينه كافي ملينه
موشفنا النتائج والاسم خسران
وانت تريد تلزك نوري ردينه
ردينا الزمن ذاك المله الحيطان
وجان ابوخته ايهمبل اعلينه
تالي من الحفر اتلكته الفيران
فار بفار يعني المشكله بينه
وكلنا اوياك بلكي انظم الاحزان
فرحنا وللزمان الجاي غنينه
وتالي الغنى راح وكثرن الاحزان
وليام الفكر يانوري حنينه
تدري انت بسببكم مابقه انسان
يعيش بهل بلد وكل احنه هجينه
هجينه وندور وين نلكه احسان
نمد الايد وندور الينطينه
ياهو الينطي وحنه اغلى الاوطان
يمد ايده العراقي وانت ناسينه
خلص يانوري ماظلت بعد خوان
لان صار الاخو يذبح بسجينه
ولو ندري رضينه بحكم الامريكان
وعلى فتك العام ياعمي احنه ظلينه
كلتو انتوا انتخاب وهالشعب فرحان
وكون انكصت ولا مشت رجلينه
على بختك يانوري صير مره انسان
وخلينه ابأمان انحني ايدينه
ابحور دموم صارت مابقت نهران
وطوفان القتل والله سابينه
لو مسلم صدك روح اقرأ القران
ابعداله الحكم مو ربك موصينه
ولو تطلب عداله انت مو ربحان
يانوري دبسك والله ملينه
يانوري علينه والله ملينه
رد مع اقتباس