يبو تراب الذهب يالريحتك عنبر
يحزام الظهر ينشد لو نار الزمن وجــّر
تنوني الروح بالغربة
يالحبك زرعته بروحي واتجذّر
ياخيمة التلمنة لو لفانه الضيم
حضناك بكلبنه ووسط الروح تنذر
نحبك ,, اي نحبك ,, وكلنه نتفداك
واظن حبنه إلك مايوم يتفسر


شيفسر محبتك غير دمع العين
وشيفسر غلاك وانته منه اكبر

غلاي انته واحبك ياوطن والله
واحب موتي معك لو يصير احمر

اجيتك ياوطن ملهوف تالي الليل
واريد اترك قصيدي فيك يتبعثر

واريد القي التحيه لاهلي الطيبين
واخص اهل الجنوب ومنهم اتعذر

انا ابن الشمال واهلي بالاهوار
وانا ابن الجنوب وراسي ما يفتر



بعراقيتي أظل للدوم آنه افخر
ولا غيرك سكن بالروح لو أثـّر
أحن واشتاك لترابك
ونسيمك لو يمر بالروح تتوذر
على اعتابك أحني الهام لو مريت
وحنــّي الروح لو شفتك عشك اخضر


وليلك من يسامرني بغربتي
الف مرة ألم بالروح واتطشر