جفـّك سراب
هلبت على عيوني وجهك اتطشـه
صاعد درْجه درجه الملح فوكَـ العود
اليابس بعودي بجيـّتك رشـّـــه
بنه فوكَـ الجمر طير الجرح برْماد
وريح الغيض هبت بعثرت عشـّـه
شاتل انتظاري بمحطات الليل
والغربه مناجل ظلـّت اتحشه
تانيتك فجر يطلعلي بعد غـياب
مرود للنده ويكحـّــل الغبشه
وتانيتك مثل عود البخور الظال
ميت بس عطر يتشظه من نعشه
تانيتك ولم امن الصبر ناكَـوط
اصرخ وبصلافه انطيت اذن طرشه
وتوسلتك محطه لسفر ماخلصان
درب الخلكَـ مدمن بس على الممشه
وتوسلتك جرف لن البحر خوّان
باع اسراري كلهه بصفقه ويْ قرشه
بالغت بحنيني وطلع حلمي اوياك
جن ظهر البعير القصمته القشـّـه
ياأوّل نهر مايروي لوشربوه
نروه وحيل نروه لمـّن انعطشه
ويا أصعب سؤال سنيني بي تحتار
لانكَـدر نحل لاترهم انغشـّــه
وياطيف العمر عفيه اشكثر خطوات
الك وبمجرى دمي اسنين تتمشه
ورغم جفـّك سراب الخجل ظل عالباب
ارسم دكَـّتك والباب يتغشـّــه
( منقـــــــول )
ارجو الإطلاع على هذا الرابط للأهمية
رد مع اقتباس