مثل حال المشط ساوتنه الايام
انجفه ويانه الوكت وتساوت الروس
نتفاخر نخل ومعلك الهام
وبعروكه يتربه وياكل السوس
ربينه اللحايه وعفنه الايتام
وزعلنه من الوكت زينهن بموس
طبع بينه العزيز بساع ينسام
وطبع بينه اعلى جف المشتري انبوس
بعنه ارواحنه بدكان الاوهام
ومن شفنه السراب اتبدت الطوس
زوكنه الحقيقه بكومة اقلام
وبمنخل عتيج انغطي الشموس
راوسنه السفينه بحفنة ابلام
وبدلنه النهار بسمل فانوس
كضينه العمر نتنطر ايمام
ومن مال الحرام الجيب متروس
ماتنثني عيونه العينه من جام
ولاذل لو لمح رجليه الطاووس
ولا يخجل تراهو الذبهن وكام
وخسر داسه وعليه اتوالت الدوس
ناس اعلى الكرامه بلا عشى اتنام
وناس اعلى الاهاين تدفع فلوس
وناس تعيش ما داستهه الجدام
وناس اعلى القنادر روسهه اتدوس

بقلمي
محمد عبود العبودي