جروف الامل
ومحمل سوالف ياما الك مشتاك
جا وينك ....
مو ذبلن عيوني بكثر ما اصد ليك !
وتغيب الفرحه بعيوني
واظل تانيك ...
واتمايز ضحكتك واشبك ضنوني
وتلمني الاه ..
واخلص عمري بجم اه ؟!
تسافر روحي جنهه الموت
وين تريد ؟
اغركت اني بدمعتي وانت صوتك وين ؟
مليت انتظر واغفه اعله باب الاه .
ويالمبعد تعال ..
وشوفني بياحال ...
غركان بودادك وانت جيتك طيف ..
ومامريت ؟
وشكثر غنيت بسمك وانت ماغنيت
تعبت السهر وياااي
وسهرت النجوم وياااي
ناطر جيتك كلاده اعله باب الجيد
وناطر شوفتك غنوه واكلك عود ؟
جا .... وينك ؟؟
يخايب عود !
على جروف الامل ظل الكلب مشتول
وكل ساعه ويهزه الروج !
ومتانيك ... تنشف يادمع ماظل دمع بالعين
وتشبك ياحضن ... سليت وانت بعيد !!
وتانيتك تجي ...
واذبح حزني بدربك واشمك حيل
شسولفلك ؟ بجيت هواي وانت بعيد
ونطرتك ماي وانه العطشان لعيونك
واكول تعود ...
واصبر كلبي بالسكته واظل تانيك
جا ... وينك
موحتى الصبر سافر مشه وياك
وانه بلا صبر وعيوني تترجاك
بسك عود
ماجد الشاعر
4 / 6 / 2009
رد مع اقتباس