الشاعر حسين سالم يوسف الشميساوي

في عام 1969 ولد الشاعر حسين الشميساوي في سوق الشيوخ ،كتب الشعر الشعبي وعمره لم يتجاوز العشرين عاما متأثرا بالشاعر الكبير عريان السيد خلف والشاعركاظم اسماعيل الكاطع كما ان لبيئته الحافز الأكبر لميوله الشعرية ، اضافة لذلك فقد قدم اعمالاَ مسرحية ناجحة كتب في الوان الشعر الشعبي ومنها القصيدة والأبوذية والموال ومن قصائده:


عظم هدهد
انه ياصاحبي ماعندي وجهين..حته انزع وجه والثاني ألبسه
ولاغرتني يوم امراية البيت.. وأوكف بالركن والزم اكلنسه
المظاهر ماتغير واقع الحال. . البيه خير خل يعتز ابنفسه
اليمد رجله اعله كد اغطاه موعيب..عيب اعلى التندهه الصبح شمسه
نمت متعوب بس فزيت مرتاح ..صار الماي حدري وكمت احسّه
يسايسني الجرف وضحك على الروج ..عظم هدهد وعاند ومشي عكسه
انه ابن المارضت بكتارهه انلوذ..وبوي الماشبج خمسه اعله خمسه
وانه الماضاع صوتي ابعازت الصوت ..وآنه الماطلع للجار حسّه
اكص اجدامي من تخونها الكاع ..وجوّي اجفوفي من اتصير نحسه
اليزرع طيب كالوا يحصد الطيب ..والفلاح يجني اثمار غرسه
لكن طيبتي خلتني ماشوف ..وصدك كلمن ايراويني ضرسه
مهيه اتغالطت نبضات الكلوب..اذا يانبض منهن راح اجسّه
الحقيقه اتكون مره ابعض الأحيان..وبعض الورد يذبل من تلمسه
الحب ضاع وحنه الضيعيناه..لأن ماجنه نحترمه ونقدسه
وحياتك ماسهرت الليل بطران..ولا متواعد وشبعان ونسه
يمر بيه الحجي المايطري عالبال..وتيه ابين صفنه ودمعه خرسه
قطار الذكريات ايودي وجيب ..ومحطات العمر من عدهه شنسه
لهسه اسّولف ابجرحي السجاجين..والنيشان بعده ابظهري لسّه
ولوعشريني خلصن طيف جذاب..وثلاثين ابتدن بظروف تعسه
مامعقوله ابقه اركض وره الغيم..حتما استقر ولكالي مرسه
كفاني ازعل وسد الباب وغتاض..وأرد افرش شليلي اعتاب اترسه
على كل حال الف الحمد لله..خذت حيفي وكسرت اعيون شرسه
حسن شاطر ويحفظ كلشي عالغيب ..قره اكتاب الزمان وحفظ درسه


المسرحيه
يكفيني فخر فرزنت الوجوه..وشفت ياهو الألي وياهو العليه
شفت كلشي ابحياتي اشكال وألوان..وحملت اهموم وآهات او أذيه
لكيت أكلوب مامسها الزعل يوم..ولكيت اعقول متحجره اوغبيه
غشاني الوكت بشعيط ومعيط..ماتدري الأصابع foraten.net/?foraten.net/?foraten.net/?foraten.net/?foraten.net/?ه
تيهت الرسن والدنيه مركاض..وكت خوف او شظّيه اتطك شظّيه
الوجن بالصبر وتناوش الراك..وأجلب بالصخر بثنين اديه
اصدك وأمسح ادموع التماسيح ..وارد اضحك جذب والبيه بيه
العمر جام اوزماني ايشامر احجار ..وحياتك موش كسرت مزهريه
من كضك سموم الصيف بجاك..منو غيري وكف وأنطاك فيّه
كتلك لاتحط بالغربه رجليك..نزيزه الكاع وجدامك رخيّه
كتلي العوز يكتل يشده البال ..مايعرف فقير او لا خطيه
جاسمتك خبزتي اوكلبي مرتاح..وأحن لمسامرك صبح اومسيّه


موقع مدينة سوق الشيوخ

مع تحياتي