انا وشهرزاد والسندباد البحري .

[6erqa3h]

السلام عليكم

امس كان النت عندي ضعيفاً جداً لذا قررت ان اقضي الليله مع مخزوني من الكتب القديمه ..
لا على التعيين مددت يدي الى مكتبتي القديمه وسحبت كتاباً ضخماً ... قرأت العنوان كان ( الف ليله وليله ) ... بدأت بتقليب اوراق الكتاب فظهرت على اولى صفحاته صورة لشهرزاد وهي تجلس قبالة الملك شهريار وتقص عليه قصصها الغريبه الحوادث والعجيبة الاحداث ..

هنا لاح بفكري ان اتحاور مع شهرزاد ...
قلت : السلام عليكم ياشهرزاد .
قالت : وعليكم السلام عمي طركاعه .. وين هالغيبه .. صارلك خمس سنين تاركنا
قلت : لقد اخذني منكم صديق جديد اسمه الأنترنت ولكنه اليوم خان موعده معي لذا لجأت الى مكتبتي القديمه ..
قالت : اهلا بعودتك من جديد . ونرجوا ان لاتتركنا وترحل سريعاً .
: قلت : ذلك عائد الى الظروف . لكني اليوم حبيت اسولف وياج .
قالت على الرحب والسعه .. اسمحلي ان استأذن من سيدي شهريار اولاً .. وانت تعرف هذا منعول الوالدين ايده والسيف .. واخاف يكطع راسي
قلت : اي اعرفه واعرف سوالفه التعبانه مال الخوشيه والشقاوات . وهذا حال حكامنا اليوم . كلهم يكطعون بروس عباد الله من شعوبهم ...حتى انهم اورثوا طريقتهم لمن يدعون الجهاد فاصبح قطع الرؤوس شي عادي وعلى قارعة الطريق وبلا نطع ولاسياف .. وكلهم محزمين بقامات وخناجر وسكاكين ,
قالت : عجباً .. اراكم متطورون اكثر منا .
قلت : المهم ليس هذا موضوعنا .. استأذني وعودي بسرعه يرحمك الله .
تركتها وجعلت اقلب صفحات الكتاب ... فمررت على قصص السندباد وعلاء الدين وفانوسه السحري
وياسمينه والمارد وما الى ذلك من قصص ..
فتبادر الى ذهني لو ان علاء الدين اعارني مصباحه السحري ليوم واحد . فقد استطع ان اعمل اشياء كثيره بواسطة مارد المصباح .
عادت شهرزاد وجه الصباح محمرة العينين وهي تتثائب من فرط النعاس
قلت : لقد تأخرت كثيراً .
قالت : مو هذا منعول الوالدين كلما اخلص من سالفه يمد ايده عالسيف .. شسوي .. اضطر الزكها بسالفه جديده الا ان انخمد .. ورفعت يديها الى السماء وقالت بحرقه والم : ( ربي بجاه كلمن عنده جاه عندك .. دعوة حرمه مالها والي ومكسوره خاطر .. تخمدلي شهريار خمدة اهل الكهف وتخلصني منه ) .
ثم التفتت الي وقالت : سولف عمي طركاعه ولو مالي خلك وهلكانه من النعاس . لكن تدري ماعندي مجال غير هالوكت ..
قلت : ياشهرزاد .. اسألك عن سندباد وعلاء الدين ومصباحه السحري والمارد وياسمينه ...

قالت : صدك جذب عمي .. شنو انعديت من شهريار .. هاي ينرادلها سنه ونص متخلص السالفه . اختصر فدوه اروحلك .. اريد اروح انام .
قلت : طيب ... اسالك عن علاء الدين ومصباحه السحري .
قالت : وشتريد منه ..؟
قلت : اريد اتدزين عليه وتتوسطيلي يمه حتى يقرضني المصباح 24 ساعه بس .
قالت بتعجب : وشتسوي بالمصباح .؟
قلت : ياشهرزاد اريد افتح بيه المغاره مال الحراميه وارجع الفلوس اللي انهبت من العراق .
بالمناسبه هي المغاره بعدها تشتغل على نظام ( افتح ياسمسم ) .
قالت : اي بعدها .. بس شويه تغيرت اللهجه وصارت متطوره اكثر .. هسه النظام صار ( اوبن سماسيمو ) . !
قلت : اها ... يعني صار نظام اكسبي وندوز لو فستا .؟
قالت : شمدريني والله .. هو يكول اوبن سماسيمو .. تنفتح المغاره ..
لكن هسه اني راح ادز على سندباد وهو يندل علاء الدين وين ...
فجأه ظهر سندباد من خلال احدى صفحات الكتاب ..
قلت : هلو ابو السنادب .. هاي وينك من زمان والله مشتاقلك ... ليش ما اجيت قبل كم سنه ؟.
قال : هلو طركاعه .. ليش اني زوج اجي قبل كم سنه .. حتى لو جيش شعبي لو جيش القدس ...
لو جندي احتياط بالقادسيه وام المعارك ... لا عيني اني جنت فالت بالكتاب . واكبر انضباط ماكدر يلزمني ..
قلت : والله عفيه عليك على هالختله المحترمه ... هسه اريدك تشوفولنا علاء الدين وين صار لأن محتاجه بشغله مهمه ..
بكى سندباد بحرقه
وقال : اويلي على علاء الدين ... ماتدري شصار بيه المسكين .؟ مو راح للعراق يلزم مقاولات ... وجان يلزموه مغاوير الشرطه بتهمة ( 4 ) ارهاب ... وهسه يسمع حسك بسجن بوكا ..
قلت : زين والمصباح .. والمارد .. وين صاروا ..؟ وليش مخلصوه ..؟

قال : عمي يامارد .. يامصباح ... صادرتهن الحكومه .. وراحوا فتحوا المغاره وصفوها على ايديهم ... وهسه السماء والطارق .. بس الفيران تلعب بالمغاره .
قلت : يعني الكنز اللي بالمغاره مال الأربعه والأبعين حرامي انلغف ... ؟
قال : تعيش اذا لكيت منه شي .. تقسم على الجماعه بالتساوي وابوك الله يرحمه .
قلت : زين والنزاهه مالتكم وين صارت ..؟
قال : انظمت الى لجنة نزاهتكم وخربت الشغله ..

اغلقت الكتاب دون اودع احداً منهم وقررت العوده الى صديقي النت وحلفت على ان لا اعود مستقبلاً لفتح اي كتاب مرة أخرى .

طركاعه
14/5/2009