اجيت
كتبت لها قصيده وكانت بعنوان (تعاي) وكم تمنيت ان ترد علي بقصيده يكون عنوانها ( اجيت ) وبما انها ليست بشاعره كتبت انا هذا النص لنفسي واعتبرته ردا منها . وسؤافيكم بالاولى لاحقا كونها لاتحضرني الان وكأني بها تقول ..
اجيت بلهفة مفارك
اجيت بكل حنين الروح
اسمعت حس التعاي وجيت
نفضت شما بروحي جروح !!
اجيتك ماي يل عطشان
باب وللفرح مفتوح
اصفكي جناحج اتكلي ؟
فرت روحي الملكاك
اعاين لنهه كلهه جنوح !
اجيتك ياشريج الروح
مسودن شوكك ومفضوح
اجيتك لاتظل مجروح !
اجيتك وك جزعنه النوح
اجيتك شايله احجايات
ترضه انكولهن ونروح ؟
يابيدر تعب عمري
اعوفه شلون المن جا اتعب الروح !
اجيتك صوت يصرخ بالكلب ويصيح
اجيت انه حمامة دوح !
ولو جنحي زغير ومايعتني بعيد !
ولو حجيي تكسر بالصدر مذبوح !
اجيتك وردة كرنفل
عطري بكل زمان يفوح !
تشم ريحة ودادي واني اشمن بيك
شوك سنين فزز كلبي المطروح !
اخذ جفي بجفوفك عتني بهيده !
اغركت انه بسواليفك
سبحت سبوح !
وشلي بصوتي من دونك
عسنه . اخرس .
عسنه مطبك ومبحوح !
وعسني لاصرت لاجيت
واذا موليك جا المن اعني الروح !
واذا موليك جا المن نوينه انروح ؟؟
تقبلوا تحيات اخوكم ماجد الشاعر
رد مع اقتباس