قصيدة للشاعر رحيم المالكي (رحمه الله)
متزوج أرهابي
_____________________________
تريد أكتب غزل وانساها الهموم

وآنه ويلغزل نافض كوامه

شكتب ياغزل واتعزل أبيش

يخي خليها سكته بلا ملامه

انا شاعر حقيقي واملك احساس

اترف من جنح اترف حمامه

ويهزني الجمال الحيل مملوح

واطرب لو شفت بعض الوسامه

واسكر وانتشي بنظرات العيون

وتسحرني الشفايف بابتسامه

لكن وادري لكن سبب بلواي

المثلي واجب يسحب كلامه

خصام ويه المره من قيل عشرين

فشك وسلاح يوميه انترامه

ما اكتب غزل صدكني معذور

شما اطب البيتنا تقوم القيامه

متزوج أرهابي ولابس احزام

بس يزعل عليه ينسف حزامه

انا محتاج خطه امن للبيت

تطب لبيتنا وتنزع الغامه

حتى اكتب شعر من صدك مرتاح

واوزع هاتفي وانشر ارقامه

لان موبايلي يوميه تفتيش

تشوفه عيون زرقاء اليمامه
______________________
أرجو ان تنال رضاكم