كله لخاطرك ولخاطر عيونك

اندلك واجيك واكدر اوصلك
ادورك ما امل والكاك واندلك
ولو حبة رمل عنوانك بصحراء
اشمن ريحتك بالكاع واوصلك
وكدرت الفرح يسحل علّي بي طول
بس ثوب الحزن لا زين كفالي
هذا يمر علي طيف بجفن سكران
وهذا من الزغر لليوم يبرالي
ذبيته الفرح كحله بضلام الليل
ذبيته ونسيته وراح من بالي
لكوه غيري واجو دكو عليه الباب
الك هذا الفرح لا كلت مومالي
هاون بكلبي شكد طحن حب وطيب
صكت دنيتي وما بردن دلالي
اكض ركبة حمامه واذبح السجين
بس كون الوكت ساعات يصفالي

ويردونك تضيع وانته نوربليل
وتموت من العطش يالماي يردونك
ويضيعونك عجيب وانته مثل الريح
وين بيا مكان تضيع يلكونك
مشوك بدرب ما ماشي جدمك بيه
وحتى تضيع كلش شدوعيونك
وغشو عينك واديك مزنجله ومجتوف
وتهد هدة اسد لو ناس ينخونك
يالمغفي الجمر منقله وبيك ينام
وهمه ارماد موكد ما يجوونك
اذا ضلك طلعته وضل وراك يحوم
ابد لتخاف منهم ما يلحكونك
عاشرنه التعب والاه والحرمان
كله لخاطرك ولخاطر عيونك
تعلكنه قطع سوده وعليها ارواح
ما جنها قطع لا كحله لعيونك
ويردونك صبخ والملح ياكل بيك
ويردونك تبور وما يزرعونك
ذاك حسين حي وصير مثل حسين
وبالشدة الخريطه تصير ميمونك
يا مدري شوصفك شرد اكولن بيك
اذا هوه العمر ما يسوه من دونك
ليلى انته صرت والمثل ما ينقاس
وشعبك من محبتك صار مجنونك

للشاعر المبدع سميرصبيح