بقلمي-بجت حته المدينه
=بچت حته المدينه=
ييمه وداعتچ بعدچ بچينه
عگب عينچ بچت حته المدينه
عيد الناس حسيناه مو عيد
ملابس للحزن رحنه اشترينه
ييمه وداعتچ حته المراجيح
يوم العيد شفناها حزينه
مو بس بيتنا يايمه زعلان
الدنيه بحالها زعلت علينه
[COLOR=#000080بعد عينچ ييمه من رحلتي[/COLOR]
حسينه الوطن ما راضي بينه
وحشه بكل كتر كل الشوارع
مثل وحشة العشره عد سكينه
شفنه ارواحنه مثل المساجين
واساره بلا سبي چنه انسبينه
تعودنه عليچ واحنه ازغار
واكثر من كبرنه اتعودينه
كبرنه ونسمع بصوتچ دللول
وچنه ازغار وبحضنچ غفينه
چنه ابليلنه نفرح ونرتاح
وگلبچ بالقلق ميت علينه
ييمه من يتانينا على الباب
عگب عينچ اذا باليل اجينه
يافيض السيول بشحة الماي
يا اول نهر منه ارتوينه
يا بلبل يغرد فوگ الاحزان
ويطيرنه فرح ويطير بينه
يانسمة حنان بشحة الگيض
وبيام الشته بحضنچ دفينه
هيهات نتلاكه بمثلچ احباب
دورنه اعله مثلچ ما لگينه
ماضن بالرثاء تردچ اشعار
ولا دمعه تردچ لو بچينه
كلمات
ناصر اسماعيل الموزاني
كتبت بتاريخ1996
في الدنمارك{ اودنسه}
رثاء لااحد الاصدقاء الذي
توفيت والدته يوم العيد
رد مع اقتباس