المشترك ... مشغول !!

متغير حبيبي

ومَنْ ذا الذي يا عزُّ لا يتغيَّرُ

متغيِّر حبيبي .. ومـو علـى أوضاعـك

گلّي إشصـار بيـك .. وبـدَّل إطباعـك

صايـر مـا تجـاوب مـن أدگ إعليـك

وبْـرَدِّ الرسـائـل خـافـت إشعـاعـك

جوَّالـك سكـت لا مسـج لا مــسگول

چان بكـل دقيقـة إيفـيـض بابـداعـك

ياخذنـا الوكـت ونسولـف آنـا ويـاك

ونـغـرِّد ســوى بالـحـان إيقـاعـك

ولا يخلص حچينا.. وتخلـص الساعـات

ويصفِّـر رصيـدك وآنــي سمّـاعـك

كل يوم الصبح ترسـل "صبـاح الخيـر"

وبكـل كملـة منهـا ايفـوح نعنـاعـك

چنت من دگَّة وحدة أهلاً "حبيبي" تصيـح

هسَّه . . "المشترك لا يَـرُد" قَـدْ باعـك!

"حاول مرة أخـرى".."المشتـرك مشغـول"

بلكي بوكـت ثانـي إيشـرِّف أسماعـك

صايـر هاتِفَـك "خـارج نطـاق الكـون"

مو بـس العـراق.. ويصعـب إرجاعـك

چنـت إتگول: "أتمنـى الزمـان ويــاك

يـوگف .... وبحنـان أتوسـد إذراعـك"

وتزعــل لو گلتلك : راح "بعـد إسبـوع

يتفـرق شملنـا" ومشكـلـة إقنـاعـك

عشت اببحر حبَّـك وانـتَ بيـه سفّـان

هسَّه اببحـر هجـرك شايـل إشراعـك!

ودموعك سگتنـي وآنـي وردة شـوگ

وانتَ اللـي إزرعتنـي اببيـن أضلاعـك

هيچي اتشح غيومك واني أضوگ الموت!!

ويفتني العطش واذبـل وسـط گاعـك..

ترضى إيموت گلبـي الينبـض بطاريـك

وانـتَ الأمّنيتَـه .. وحبَّـك وطـاعـك

مـا تسـأل علـيَّ وآنـي مؤمـن بيـك

وبـحـبَّــك أذوب وأول أتـبـاعــك

ومتبـاوع ابعينـي وچنـت مـن ألگاك

بـاوَّل نظـرة منـّي إتطيـب أوجاعـك

گلّي إشغيَّرك مـا بيـن ليلـة ويـوم..!!

وتبيـع الشَّـراك وتشتـري البـاعَـك؟؟

بقلم :هاشم الفريجي