متانين شوفتكم


يابه يابه شلون دنيا تلعب بذوله وهذن
تطوح بروج الحبايب مثل مشچاوة لبن
وهمه من لوع المحبه راحت عيون وعمن
ناظرين وناطرين الجيه منهم
شاتلين الجدم ما همهم تعبهم
وطالت الهله عليهم شهور ساعات وزمن
والدمع اخ الدمع من يهدل براگ الجفن
روج يسبي ولايعوف
يسهسه گلوب ويدوف
ولا يكفكف ضيمه چاره الا بجروف الردن
واااااخ ياطور التغلي يضرب اوتار ويرن
وبين كل ذوله وهذني
وبين احلام وتمني
تزيد لچمات المتاني ويدمن اشعار الحزن
ويحترگ بالفكر بلكي يلگى ذكرى من المضن
وينبش بلا وعي بعتمه يصرخ وانوبه يون
بين كومات الرسايل
تلوح وجنات وجدايل
هاي هاي اللي تلالي هاي صوره من البقن
هااي صورتكم يغالي تفوح بعطور الوسن
وهسا طابتلي الليالي وراح اسمع كل شجن
اعزاز عدنه ...
ياحريمه ...
راح أسمعهن وچوچي يمكن يغمضلي جفنن
وحتى لو أغفى حبيبي طيوفك يروح ويجن
يابه يابه
شلون دنيا تلعب بذول وهذن