العرق العظيم

[هدار سامي شياع المنصوري]

ملف مرفق 5608



الناس 00طبع الناس تعشكَ
والعشكَ مشروع00مو عيب وحرام
احنه دنيتنه جميله
ونعشكَ لها الخير والحب والسلام
العراق صار ابضمايرنه
عطاشه اعليه ريعونه
لوشفت العلم بيه رايه والنجمات
واسم الله عليه بقماش مزيونه
منذورين
نهتف من كَلب ولسان
بعالي الصوت ويسمعنه كل انسان
اسمك ابد مامات باقي للابد
نعم00نعم00مامات صدكَونه
ولا فديوم مربيه موت
موش انريد نحجيله
صحيح اعزاز ضحينه00ونضحيله
العراق 0ماجل ولامل النضال وباقي ابحيله
شعبنه المر عليه المر
جلد تدري الجلد يصبر
والكَلبه رجيج ابروج مايعبر
عبرنه اسنين محنتنه وبقينه احرار
ويستاهل شعبنه ارواح نفديله
ياتراب امزيرعه وماي السويب
وياشلب شاطي الجوابر
انته جيكَور الحبيبه
واحنه سياب ونحشم يابويب
الرابطيه هلهلت وكت الفجر
بصوتها ذاك الحنين
فزعت الكَرنه اعله حسها
من جنوب الدير لشمال الثغر
مدينه طلحه هوير هوسات وشعر
احنه منذورين للكَرنه نذر
وحنه ذول احنه هلج وانتي التعرفين
ياحبيبه وباسله وتستاهلين
شفنه ابضلم صدام
تعذيب وسجن وعدام
سوه وي شعبنه الماجرى ولاصار
حروب وجوع وستهتار
وملايين النشامه هاجرت لبعيد
غربه وفاركَو اطفالهم جم عيد
وهوه جرود يشرب واجله بس غزلان
ودموع الارامل تترس الوديان
جماعيه المقابر صفت للشبان
وركَ اخضر حلبجه الموت وصمة عار
ابجيبه وبجيب البعث واركانه
جند للاعلام الخوش عدهه السان
شب نار الحرب والقدس حزنانه
يغرف بالفلوس وينطي جيف انجان
وخلاها تمركَص ركَص عريانه
شجره نضموله وقائد الايمان
صلاح الدين صار ونبوخذ نصر
نعم 00جا وينه اخو افلانه
تاليها ابحفر شفتو الفلك من دار
بطل من علي اوهابي عنوانه
اهو خله الجيوش اطب علينه اطبوب
وهو باع العراق ابيورا وبدولار
لجن والله الشعب تاريخ اله ومهيوب
من وكَت الرميثه وفالته ومكَوار
صحيح الوكت يطلب صبر ايوب
ونصفي احساب للطالب اومطلوب
كفاره شعبنه النمحي بيه اذنوب
احنه اهل العراق واهل هاي الدار
متوحدين كلنه عرب وكراد
من اعله القمم ولبة الاهوار


نبني اعراكَنه بنيان
ونكَعد عله اربوعه اصرار
صدكَ محتله اراضينه00
لجن ابد مانركع
نعم ندري الشمس تطلع
نعم كل غيمها يكَشع
والي غاب عن اهله نعم يرجع
عهد نبني العراق الحر
دمقراطي اصيل اروع
ويضل اسم العراقي شامخ ويلمع
00000
ارد 00ارد اردود للنشدو اعلينه
ورد اجاوب كل كَلب ملهوف
وعيون الفرح تدمع
موبس اعراكَنه نفتح
فتحنه اكَلوبنه من زمان
ويضل صوت العراقي ايزاود المدفع
اعراكَنه ابزودكم مفتوح
مضيف الكل شهم ابدع
يرحب يمد ذرعانه
يتلكَاكم صدر اوسع
نحيي كل شريف ونشد جف ابجف
وكَلوب العراقيين حتى من البياض انصع
موش اطباعنه نتعاله فوكَ الناس
ونعاهد شعبنه انصير اله نبراس
ماتهمنه التضحيات احنه نتحده الممات
نبقه رايه وعاليه ابسوح النضال
ونبقه ذيج اطباعنه وذيج الخصال
ونبقه ذيج اطباعنه وذيج الخصال
تقبلوا تحياتي
وانشاء الله تنال اعجابكم
هدار المنصوري00