احاول

أحاول
وبمحاولتي
نهايه الـــ قصتج وقصتي
تسأليني على جروحي ...؟
وسبب كل الجروح انتي

*

احاول للسؤال الكًــــــــــه
جواب بدفتر الفركَــــــــه
تعدت ساعة الملكَـــــــــــه
بعد شيفيد عاودتي ...؟

*

احاول اكتم اسراري
وضم اوراقج بناري
وإذا صح للعشك شاري ...؟
أبيع شلون ما بعتي

*

أحاول اجمع اوراقي
واعيش بعمري الباقي
نديمي السهر ...
والساقي
كلام احجيته بصمتي

*

صحيح آني انتهيت وياج
لكن ... منتهت قصتي
اسأل والسؤال انتي
وجاوب والجواب انتي



ايضا ....
حالات ...

ولا جنك يكَلبي بكَلبك النار
ولا جنك ثلج من عاشرت نار
خلص عمر المواسم والنياسين
وظل بس
الغنه الصامت ... والاسرار
نام
وصبح الناعور مشلول
لا ... ماي النهر يصعد للشفاف
ولا بيه حيل يكَدر حيل يندار
جان الفرح عدنا طير محبوس
ولكَـــــــه فرصه وتعلكَ بالسما .... وطار
ولا جنك يكَلبي فوك الارماح
معلكَ... خلصت عمرك بالاسفار
ومادامك يكَلبي فوك الارماح
ولا عندك حبيبه
ولا الك دار
شيفيدك لو تجر كل المواويل
شيفيدك لو تردد كل الاشعار
شيفيد ...!!
تمر نهر بولايه مهجوره
شيفيد ... !!
تمر محابس بيد مبتوره
شيفيدك ....؟؟
يا .... يول
يا كافي ... يا كَلبي
تظل مثل الارض يوميه إلك ...دوره
وشمتانيه الروح ...؟
وبعدها متانيه ...؟
واسنين تكَضي من العمر
كل ... ثانيه
واحلام ياخذها الدمع كل مشوار
وبيوت ياخذها المطر كل مشوار
وانت ...؟ !
انت يكَلبي تعيش للحين
ولا جنك ثلج ومعاشر النار
آنا وياك خلينا غريبين
سولتنا الجكاير... والصبر زين
وبليل الشته يصير الحزن ...حار
دافي ياحزن
للفاركَ اثنين
صاحبته وشبابه انكتلوا ازغار
آنا وياك خلينا غريبين
نحلم بالحبيبه ... وعتبة الدار
وإذا شفتك يكَلبي ... بيوم فرحان
هذا اول عتاب
وآخر
إنذار

للشاعر كاظم اسماعيل الكاطع

[نجاة أمل]

شكراً لهذا الختيار المميز..
سطور خاطبت الروح..
سلمت يمناك..
تحياتي

[الشيخ ابوحيدر]

احسنتي الغاليه فاتن
هذه واحده من روائع الاستاذ كاظم
اسماعيل كاطع لك ولذوقك كل
الحب يالغاليه

[شاكر الهلالي]

أحسنتي الاختيار اختي العزيزه

تقبلي مروري البسيط

شكرا لجهدك 0

[الكناري يونس الجبوري]

مشاركه رائعه يعطيك العافيه
تحيتي لك

[طالب الناصري]

جهد رائع وذائقه ورقيقه
برقة روحك ياغاليه

شكرا لكم ولمروركم الاكثر من رائع مع تحياتي ومودتي واحترامي للجميع وشكر خاص للاخ الكناري لمروره الجميل

[الكناري يونس الجبوري]

ههههههههه ما اروعك يا فاتن ما اروعك ما اروعك يا اغلى اخت بالدنيا
والله حاسه بي ... بصراحه كنت تعبان ومتكاسل ارد ههههههههه
وهذي خوش لزمه عليّ طبعا وربي اكتب وخدودي حمرررررر خجلتيني
حقيقه قصيده رائعه جدا وليس غريب على ذوقچ الراقي
ولو ادري من وين تجيبين الروائع كنت زاحمتچ عليها وغلبتچ
تحيتي للغالية اختي فاتن وهيب