كل عقلك فرح!!!!!

[احلاهن بطة]

كل عقلك فرح تلكة بحلك بــي نـــاي
من تلمح عيوني راح تلـكة الـــــرد

شترجى من المكابر غير طاري الـمــوت
ومابيهـــــه المشانق غير حـــل وشد

صدكت الحجي و املت بيك احــلام
لكن مالكيتك لمن صارت جـــــد

انا ردتك تجيني بوكت بــــي شمات

جنت اسمع حجيهم من امر يشـــتد
الى ان ايسوا منك ذروني ارتـــــاح

لكو غيرك وغيري والحديث انســـد
تجي هسة شبعد قصـــرت لوماجــاي

وين الكة الشماتـــــه حتـــى اكلهـــم رد
الك يد بحياتي اعـــــترف ماناســـــيك

بس انته مماتي هم الك بـــي يــــد
انه ردتك تجي الســـــــــاف الوكع تبنيه

هسه الساف خلة بس اساسه انهـــــد
حجر عثرة الجرح حطيتة كبـــل الروح

و مأمن بجيتك راح بــي تصـــــطد
ولو حد بالبدايـــــة الك ماخـــــليت

بس حاولت تالي ردت احطـــلك حد
تريد شفاف تفرح انه شرد انطــــــيك

اريد افرح ولكن مستحي مــن الــخد
غرك خدي دمع وشلت بي مافـــاد

اتصور فوك جفني ردت احطــن سد
جنت اسكت كبل لو هددتـــــني تروح

اخاف تروح مني عـــن زعلتـــــي ارتد
هسة انته رحت وانه من اخــــــــاف مـــنين

انه تناسيت كلشي واعتبرتــــك نـــد
شغير بيك كلبك مسـتحيل اتصـــــــير

هو اللون الاسود يبقى لــون اســــود
كلما جايني جاي اقتنــع وانـــساك

وبكل امنياتي جاي احــس ازهــد
اله اسباب الزعل مو عن فراغ أيـــــــــصــير

ماصار الجزر لوما ايصــير الـــمد
نفسهن ماجبت فد شي جديد ويـــــاك

ياجرح الاشوفة عدي مـــــــنه شــــكد
وعة بيك الورد شافك شــتلت سهــــام

نايم سوة روحة حتــــــــى مايشـــــهد
واسئل جفن عيني حــتى ادينــــك بي

عن لايحجي اكله بيهه جنـــت ارمــد
اشيل ضماد جرحي تريد? لاموهيــــــــــــــج؟

انته اسئلني الاول انه جرحي انشـد ؟
يستشري الحزن واستاصــلة كل يــــوم

الى ان اخبروني ان حزنك قــــــد
وصل حالة بعد منك صعب ينشــال

جروحك بي مجلبــــة جـــذره بيهه امتــد
كضة وكتك مثل ما خلص وكتـــــــــي بيــوم

وين تريد احطك باب كلـبي انســد
رذاذ ال علورد صح ندى بـــــــس لو طاح

تتغيراوصافه مو ندى ينعـــــد
بس ايجوز اذا حر الشمس يجـــــــــــــــويه

يتبخر يجوز وللورد يصـــــــعد
علما شوف دمي ينكطــــع لو لا

من حرة صــــوابي تنطـــفي وتبرد
زين انته بقى صوتي وراي وياك

انه من رحت عني مابقالي احـــد
مو جرة مكص بس ماكو اثر جفـين

جابصمات ظلت لو بفـــــعلة يـــد
فرق يوسف بريء اتضح مـــــــن تهمو

تقنعني قميصك من دبـــر ينقــد
يوسف من لبــــس جان القميص كدار

بس انتــــــه قميصك بي زغر ماكــد
اريد اقضي بجريمة ماكو بيهه شهود

بس كلمة انساني والزعل والصـد
عندي المشكلة ابين الجرح والسيف

سيفك ؟جرحي ؟كلي ياهو منهم هـــد
ولهذا انه كلما اوصل انطي احكام

اكول الجلسه هسه تنرفع للغـــد


قصيدة للشاعر المبدع ايهاب المالكي

[السومري71]

احلاهن بطه جميل ما نقلتي
ذوق مميز وحس مرهف
تحياتي لكِ وللشاعر ايهاب المالكي

[احلاهن بطة]

احلاهن بطه جميل ما نقلتي
ذوق مميز وحس مرهف
تحياتي لكِ وللشاعر ايهاب المالكي

شكرا لك اخي الكريم ولمرورك العطر تقبل مني خالص الود والتقدير

[الشاعركريم السلطاني]

تسلمين على نقل هذه القصيده الر ائعة للشاعر المبدع ايهاب المالكي
السلطاني

[al_iraqia]

شعر جميل
ومميز
الف شكر على الموضوع
مع خالص مودتي وتقديري

[احلاهن بطة]

تسلمين على نقل هذه القصيده الر ائعة للشاعر المبدع ايهاب المالكي
السلطاني

مرور شخصك الكريم هو الذي ازادني شرفا ونور الموضوع ردك العطر شكرا لك شاعرنا الكريم

[احلاهن بطة]

شعر جميل
ومميز
الف شكر على الموضوع
مع خالص مودتي وتقديري

شكرا لمرورك الجميل ولكلماتك الراقية تقبلي مني خالص الود والمحبة