عزيزه دموع عيني

[الشاعر ماجد الدعمي]

انا دموعي عزيزه
وبعض الاحيان
تغافلني وتكع تحضن خدودي
تكع طبعا دموعي لجرح بغداد
وشعندج ماي اه يالعين جودي
مو بيدي دمعتي لمن اتطيح
بيهه احس مكتوب اسمك ياعراق
وبيهه دمعات اليتامه
وتلعن انصار النفاق
*****
ومو عيب لوطاحت دمعتي
وفدوه لعيون العراق
وماتعب حيلي وحياتك
وماترك ظهري النطاق
للضحيه الطاح دمعاتي تطيح
ولليتيم الفارك احلام الطفوله
طبعا دموعي تطيح
ولعين ام صار ديدنهه المكابر
وتحجي وي المات ابنهه
شلون ماتوكع دمعتي
وشلون ما تنكلب جمره
وتجوي خدي من تطيح
واني ودموعي وصفنتي
وصوت شايل كربلاء
ورايه من طف الحسين
شايله دم الشهاده
والوطن بيهه قضيه
ومكتوب عالرايه عباره
لا ابد . متمرنه ذله
مازال بينه جروح تنزف
وما زال بينه عروك تبض
وشلون ماتوكع دمعتي
من يمر ذكر الحسين
ويعني كلشي انه الحسين

تحيات ماجد الشاعر 5/1/2008

[ام فيصل]

وعلينه بعد دموعك عزيزه ياماجد

عاشت ايدك على هذا الإحساس والطيبة

وتقبل مني كل الود والتقدير

[الشاعر ماجد الدعمي]

شكري الجزيل لك ام فيصل ولا اتصور كيف تكون مشاركاتي بدون توقيعك وبدون مرورك المميز

لك مني كل الاحترام ودوام الصحه

[هاشم نجم]

ومو عيب لوطاحت دمعتي
وفدوه لعيون العراق
وماتعب حيلي وحياتك
وماترك ظهري النطاق
للضحيه الطاح دمعاتي تطيح
ولليتيم الفارك احلام الطفوله
طبعا دموعي تطيح
ولعين ام صار ديدنهه المكابر
وتحجي وي المات ابنهه
تسلم حبيبي على القصيده الرائعه وتره ادموعك غاليه علينا وما تغلا على الوطن الذي يستاهل كل شيء نملكه
لك تحياتي اخوي ماجد
تقبل مروري

[الشاعر ماجد الدعمي]

تحياتي لك حبيبي هاشم وشكرا جزيلا لمرورك الكريم
ودعواتي لك بالصحه