ابوذيات في اهل البيت
الى الاخوات والاخوه الاعزاء هذه مجموعة من الابوذيات
في اهل بيت النبوه والعترة الطاهره وأحد الثقلين
اتمنى ان تنال اعجابكم وأسألكم الدعاء
في مدح امير المؤمنين علي ابن ابي طالب(عليه السلام)
نفوس اهل الضغاين من فتاها
وفتوات الملاحم من فتاها
انشدك عن الامه من فتاها
ويا هو الرفع رايته العليه
في مصاب الطاهره فاطمة الزهراء(عليها السلام)
مضرار الدهر للزهره ولاهي
وكلبها حكه لو يجزع ولا هي
لا هي الحظت بالهادي ولا هي
تخلصت من افعال الجاهليه
في مصاب الامام الحسن بن علي(عليه السلام)
فرح ماشفت طول العمر بسهام
ومسيل الدمع ظل يسيل بسهام
الحسن نعشه وسافه انرمه بسهام
ومنعوا دفنته يم سيد البريه
في مصاب الامام الحسين بن علي(عليه السلام)
العله عاف العله شانه ورحلك
وزمانك ماصفه ساعه ورحلك
تكطع جسمك الطاهر ورحلك
توزع شمله مابين أل أميه
ندبة للامام الحجة بن الحسن(عليه السلام)
يبو صالح نجومك علن وفلان
احل وياك حبل العتب وفلان
دينك طاح بين فلان وفلان
انوله لاجن ولوه اشلون وليه
********
دليلي ابسهم يبن الحسن مرمي
وعليك الدمع دم ايسيل مرمي
دينك بين هذا وذاك مرمي
اجنازه ابلا اهل ظلت رميه
خطاب العقيله زينب لاخيها العباس(عليهما السلام)
الكلب بالعزم صبرته ومنته
وفرشته اعله التراب يمك ومنته
منته الكافل ظعوني ومنته
الجبتني وياك ليش اكطعت بيه
********
اهمومي هموم فوك الكلب منتل
وسباح الدليل اعليك منتل
كوم ارجعنه ياعباس منتل
جبتنه وياك لرض الغاضريه
********
الدهر شتت شملنه بالظعينه
ودليلي سيوف اميه بالظعينه
وسافه الشمر يحدي بالضعينه
وابو فاضل على الغبره رميه
********
يعباس استمع عتب ولاماي
غريبه وزاردت ابفكدتك ولاماي
مهجنه بالعطش تلهب ولاماي
يخمد جمر لوعتنه السريه
عن لسان حال الصابره ام البنين(عليها السلام)
الليالي ما اصدلهن ولا عون
دعتني لا ضمد عندي ولا عون
لا عباس لا جعفر ولا عون
ولا عثمان كلها اكطعت بيه
خطاب زينب لأخيها الحسين(عليهما السلام)
يبو السجاد كلي شصار وجره
أهيس نار حدر الظلع وجره
يكلها الطفل دمه سال وجره
رضيع وفطمته سهام المنيه
عن لسان حال ام كلثوم في غربتها
رهيف العمر لظلوعي حدبها
وشبيه الكوس والحاجب حدبها
الظعاين عكب حاديها حدبها
الشمر وايشومر ابسوط الرزيه
لسان حال الامام زين العابدين(عليه السلام)
اون ونحب وانوحن وحن ويهاه
على الراح وجبدتي ابنار ويهاه
الي والد شبيه البدر ويهاه
البدر عجبه ايتوسد عالوطيه
في شجاعة مسلم بن عقيل(عليه السلام)
بنه بيت العزم سيفه وحيفاه
عجيد ويدوي بالكوفه وحيفاه
اخذ من الخصم حكه وحيفاه
وغفت عينه على اسروج المنيه
خطاب سكينه بنت الحسين مع عمها العباس(عليهما السلام)
لساني يلهج باسمك ورديت
وعساني مثلك اتوذر ورديت
اجيتك للنهر انحب ورديت
خفت لن النهر يشتمت بيه
خطاب الرباب لولدها عبد الله الرضيع
ضميري ابكعبة المحنه يطفلي
ومهجتي من تشب دمعي يطفلي
انه امك واهز مهدك يطفلي
نسيت امصوب ابسهم المنيه
خطاب رمله لولدها القاسم بن الحسن(عليه السلام)
يجاسم يبني حيلي عليك دمعاي
ودليلي بالنحب والنوح دمعاي
اشلون اصبر وانشف سيل دمعاي
وشفت دمك يسيل اعله الوطيه
خطاب ليلى لولدها علي الاكبر(عليه السلام)
راسي عليك يالاكبر يشبلاي
وجمر فكدك ابدلالي يشبلاي
لوين ابعدت عن امك يشبلاي
وعفتني بالغرب واكطعت بيه
خطاب الطفله العليله لدار الاهل والاحبه بعد الفراق
الفلك ما يعتدل بالعكس يا دار
ولا ينشف دمع عيناي يا دار
يدار الاهل اهلج وين يا دار
كولي ولا تخليها خفيه
جواب الدار
يهالتنشد عن اهلي وين ماوين
تعنوا كربله والظعن ماوين
اشتظن كلبي عليهم ابد ماوين
يون وينوح كل صبح ومسيه
خطاب الطفله حميده مع والدها مسلم بي عقيل(عليه السلام)
زماني عكب عينك سلمتني
او راحات النوايب سلمتني
رحت عدمن يبويه سلمتني
يتيمه ويا شهم وصيت بيه
منقول
مع تحياتي اخوكم
محمد السوداني
رد مع اقتباس
رد: ابوذيات في اهل البيت
