أماني الاطفال
هذه الكلمات كانت ومازالت جروحا
اهديها إلى أكثر من مليون طفل ويتيم عراقي
لعلها تكون بلسم لجوارحهم....
عربانه دفع سترت بيوت أهواي
وعوائل من عوائل عايشه أعليها
جم طفل بطفل عاشت عمر وياه
وصارت مثل عرضه بروحه يفديها
طب للسوك باجر تلكه عدنه أورود
جف العوز كسر كل أمانيها
بذرتهم قهر ونزرعت بالأم
وحاصوده الوكت كل يوم يحويها
واحدهم نشوفه ازغير من أبعيد
بس بدموعه تلكه الدنيا باجيها
تلكاه مو طفل بالهم جزه السبعين
والبراءة أتحولت وحشيه تاليها
للأطفال عيد وتفرح الأطفال
والفرحة اعتقد معروف راعيها
مو مثل اليدور كوره للإيجار
هذا الماتمره ومايمر بيها
بس عاشور عيده أيصير تدري اشلون
أذا ضاع الشغل يكعد يحاجيها
فدوه لخاطر أمي مبارك المسواك
وعندي أخواني جاعت وارد أعشيها
ويفتر بالولايه ويحجي لهذا وذاك
عمي ايجار عايز وارد اوديها
ويجي لبيته جسد والروح صح وياه
يجر بالروح كوة تكول سابيها
لأن أمه خطيه امتانيته أعله الباب
ومن أمه استحه بيا هم يلاكيها
الله ....مو طفل شايل صبر أيوب
أهموم الدنيا كلها برأسه خافيها
إلى هالحد وصل عدنه الظلم والجور
مقابل ماندعمه نحاربه أعليها
الوكت ضده وكف واحنه وجميع الناس
هاي الناس مدري اشلون اسميها
رسالة لكل وزير وكل شخص مسؤول
وكل احزابنه لازم نوعيها
رسالة لكل سياسي بمجلس النواب
رسالة من الطفل بالدم نوديها
مو انه الكلت كل طفل هيجي ايكول
وانا لسان الشعب وحجايتي احجيها
ألعربانه الدفع ندفعها وكت العوز
وتنطينه ابكثر ما احنه ننطيها
ودفعناكم أمس بصواتنه ابلاخوف
نفسها الدفعتك بترت رجليها
بيوت الشبعتك من مر عليك العوز
ذره من الطحين اليوم مابيها
فكر بالشعب وانتبه لايغتاض
ويكلب من يضوج أسفلها عاليها
لتكلي انتظر شنتظر منك خير
معاناة الطفولة شوكت نلغيها
أبفضل أصواتهم هسه انتم تحكمون
وهسه أصواتكم زادت بواجيها
هذوله أطفال لازم بس فرح يلكون
وادموع البواجي الكم نخليها
لأن ذوله عطاشه ولازم انه وياك
نلم دموعنه ودمعات نرويها
ولازم بالوجوب ومو بالاستحباب
ألعربانه الدفع مدرسه أنسميها
لأن سترت أجيال وعلمت أجيال
وضيم الدنيا كله وداعتك بيها
أذا مرت علينه اعتقد واجب صار
بالاستعداد نوكف من نحييها
_________
منقوللل
رد مع اقتباس
المشاركة الأصلية كتبت بواسطة سلام الدراجي
