قصيدة ابكت العراقيين

[أنثى شرقية]

كضيت الليل كاعد والفجر شعع

ردت مطلع قصيده وماقبل يطلع

اجيت وجيبي فارغ كلت مامجبور

مالازم قصيده اليوم بس اسمع

غمضت الرمش لحضات بس لحضات

شفت وجه الحسين وكلبي يتصدع

وقريت بعينه جلمه وجنه اليه تكول

اذا قلمك نشف عن الشعر اطلع

مامعقوله شاعر والوطن مجروح

ماتبجي القوافي وعالورق تركع

يبن هذا الوطن حط اذنك عله الكاع

تلكه الكاع تنزف لو وكف مقطع

وانه اشكيلك امامي الحال هذا الحال

العراق اليوم اصبح مثلك مكطع

حته الشمس زعلت سدت البيبان

راحت وطن ثاني وبعد ماتطلع

جثث تاكل جثث ودموع وفوك دموع

وثكاله بلاسند وكبالهن رضع

حته السيف مل من الكطع بالروس

ظل السيف واكف والركب تكطع

يادوله المثلنه اطفاله يموتون

وياعين المثلنه بهالوكت تدمع

جان العلم نور نعلمه للاطفال

هسه العلم نار نشوفه بالمدفع

كبل نكتب عبارة ورد لتكطعون

هسه ارجوك نكتب روس لاتكطع

فرق عدنه المقابر عن بقيت الناس

عدهم غاد تطرد واحنه ماتشبع

مثل حصد البيادر ناس تاكل ناس

وراشد كام يحصد بعد مايزرع

وصل بينه الوكت ماكمنه نشرب ماي

شفنه الدم مذاقه عله الحلك اروع

نشف دم الرجوله ولابعد هيهات

لدموع اليتامه خدود ماتفزع

كتبنه عله الشوارع موت زائد موت

والناتج نعرفه الموت من تجمع

ولاحايط بقه ومابيه لوايح سود

وياحايط نكلبه منكتب يتبع

احنه اهل الديانه ودوم مختلفين

كل عشره بكتر وبالهم مرجع

هوه البيت خاوي والدبج فوكاه

كلي اشلون بيتك بعد يتسنع

من برد واكصب وضلوعنه العمدان

والباب الجبير من الهوه تشلع

يامسمار يثبت هذا يامسمار

واحد بي يدك وميّه بي تشلع



منقول

تحياتي الى كل من يمر بالقصيده

[ام فيصل]

الله الله الله عليك ياعراق الخير يابو الصبر

والله ان الكلمات ضاعت مني عزيزتي

اجريتي دمعي -- وما للغريب الا الدموع على الوطن

عاشت ايدج الي نقلت هذه الروعة

والف شكر لكل شاعر عراقي شال الوطن ومعاناته بعيونه

جزيل شكري عزيزتي وتحياتي لك

[samarshrif]

يظل هناك امل ،رغم الظلام الحالك أمل ،رغم الرصاص والنار ،وفرقة الأحباب.

[أنثى شرقية]

السلام عليكم
تسلمون لمروركم الكريم والمميز
تحياتي لكم

[حيدر اللامي]

مشكورة اختي العزيزة
قصيدة رائعة جدااا
تحياتي لك ودمت بخير

تسلم ايدج على النقل المتميز والاختيار الرائع

على القصيده الروووووعه

[ذيب الغزالية]

احلام في الانتظار

الله عليج ياغيورة

والله العظيم ان القلب يوجع قبل العين متدمع

شكرا الج جزيل الشكر

وان شاء الله راجعين للوطن

لكي ودي وتقديري

[أنثى شرقية]

تسلمون لمروركم الكريم والمميز
تحياتي لكم
جميعااااااااا