دارميات

[حيدر اللامي]

اتمنى يثبت الموضوع اذا كان يستحق التثبيت



من جبت طاري هواي تيهت شوري خدرت بالفانوس حسبالي قوري

انهجم بيت العين هلگد وكيحة كل ما يمر احليو تگلي صيحة

سوبر عيون هواي .. والخشم بي أم .. والحلك شوفر ليت .. والاذن بيكم


انه الصرت چتال وانته الضحيه؟ .. چا هيه بالمگلوب ؟؟ چا هيچي هيه ؟!


بطلت مشي الحيل گمت امشي تاته .. مثل اليگودن بيه امه وخواته


ليش المظاهر؟ ليش تغير الگلوب .. بسوگ الذهب تنباع چلمة " يا محبوب "


تركض تلم فلوس شگد رايد تعيش؟ هو الچفن بي جيب مثل الدشاديش ؟


تهتم على الراح ؟ ويهمك الراح .. والعالي مو بالطول.. بالصبر ينلاح


الگلب گال : احاه ! .. گتله : أووجعتين ! .. ياهو الاجه وعزاك ؟؟ من طگك البين

.................................
ما نمت نص الليل حلف المخدة والدمع صاير سيل للركبة حدة


شلونك شلون الدار وشلون الفروخ لبسوا ثياب العيد لو بعدهم صلوخ؟


ارد انشد العشاگ من مثلي مشتاگ بحضني غافي هواي وابچي من الفراگ


رش الدرب تيزاب حافي اتعنيلك چا شلي بالرجلين الما تجيلك


رش الدرب تيزاب وازرعها الغام يصير اللحم طشار واوصلك عظام


من كثر حر الضلع احترگن هدومي وتسعين ناگة وجمل ما شالن همومي


شحچي شگول للناس من همي شحچي مليان بالحسرات بس احچي ابچي



شماتي موشمات شماتي اشرار بالگبر ويگولون يا ربي بالنار

شماتي مو شمات ! شماتي سبعة ... والثامن زغيرون يأشر بصبعه !

شماتي مو شمات ! شماتي شرطة... فوگ الگبر ويصيح: بايگله جنطة !

شماتي مو شمات! شماتي شمات ... فوگ الگبر ويصيح: حي بعده؟ لو مات!

شماتي مو شمات ! شماتي ورطة... نصهم امن واجرام .. والباقي شرطة !

شماتي مو شمات ! شماتي فطّر... بالگبر دگو شيش .. خافوا ليفطر!

شماتي مو شمات ! شماتي خوتي .. حتى امي ياهل ناس .. تتمنى موتي !


.................................
أگدر اسكت الناس وأمك واخوتك ... گلي شيسكت اهواك لو درة بموتك ؟

الميت إشمدريه باليمشي جنّاز ... لاچن طبع بالروح تمشي ويه العزاز

الميت إشمدريه باليمشي دفّان ... لو يدري بمشي هواه ..چا شگ الچفان

يا عازة الخوّان عازتها عازة ..... والماوراها صياح .. وحشة الجنازة

ميت والمعزيات موش أمّهاته .... ما يبچن إعله المات ؟؟ يبچن شماته !

ميت والمعزيات ما بيهن أمّه ..... وحده إتشتّم بيه .. أوحده إتغمّه !!

ميت والمعزيات يبچن عياره .... طفّن على التابوت راس الجگارة !


صح الفلوس اجيب كلشي التريدة بس شروة الاخوان كلش بعيدة


رحت انا للدكتور وشاورني بسكوت لو ولفك يداويك لو باجر تموت

حسين اصيح حسين من صغري يحسين

ساكن ابلب حشاي ما شافتك عين


بين الحسين وبين حضرة العباس

روحي ترد وتروح ضلت يا هالناس



بالك تمر بالدار عنها أشمر بعيد

دار الحبيب هواي نوح بجي تريد


شحجي وشكل الناس عن ضيمي شحجي مختنك بالحسرات بس احجي ابجي


مابقى فد شريان يتحمل ابره

كـَلبي امجرح اجروح منهو اليجبره


سليمه بت سلمان سايل كحلها

دينار الك بخشيش بس تغمزلها



اشكر شهر عاشور سواها موده

لبس حبيب الروح دشداشه سوده



لك احسبني ما سويت كل زينه وياك

جاملني مثل الناس يال كَـلبي يهواك



*ابني و ادكَـ بالساس صار 12 عام
هدم الواشي بيوم خل ترضى الاسلام

[حيدر القريشي]

روعه روعه روعه يغالي
دارميات اكثر من رائعه
شكرا الك حبي على المجهود الروعه
وتقبل تحياتي
اخوك حيدر القريشي

[اسدالعراقي]

شكرا اخي العزيز مغترب اوسلو الورد
على الدارميات المميزة

احله دارميات مع تحياتي سعد ديترويت

[عاشق عيونك]

سوبر عيون هواي .. والخشم بي أم .. والحلك شوفر ليت .. والاذن بيكم هههههههههههههههههه
يسلموووو مغترب رائع



تحياتي

[محمد السوداني]

الميت إشمدريه باليمشي دفّان ... لو يدري بمشي هواه ..چا شگ الچفان .
رش الدرب تيزاب حافي اتعنيلك ***چا شلي بالرجلين الما تجيلك
رش الدرب تيزاب وازرعها الغام ***يصير اللحم طشار واوصلك عظام

عاشت ايدك اخويه العزيز دارميات رائعة
تقبل تحياتي وشكري الجزيل منور حبيبي انته

[حيدر اللامي]

شكرااا لكم نورتو الموضوع تحياتي لكم جميعاااا

[حيدر اللامي]