يا علي

[هاشم نجم]

خيعونه اليطب بحضرتك مظلوم وخيعونه اليشكي اهمومه بالحضره
يا سيف النبي وفرحة المسكين وياباب الصبر الي خلص صبره
تمنيت بضريحك روحي من تروح يا زوج البتول الطاهره الحره
حتى الانبياء تندب علي الكرار اسمك يا على بالموزمه اشكبره
تاريخك مجد يا سيد التاريخ يا علم الفلك والكون والذره
منهو مثلك علي ضحه اشكد للتاريخ واخر تضحياته يضحي في امره
ومنهو سموه اسد في مهركة صفين وبصولة بدر خله الزلم حدره
ومنهو القهر امة بني اسرائيل وضلت الى الان باءسمه منقهره
علي اسمك كبل ما واحد مسميه جبرائيل خط اسمك على الصخره
بالكعبه يحيدر طلكت امك بيك وحتى الجني الازرق لبد بجحره
يونس ندب بيك انت كبل لتصير وكال احضر علي وخلصني بس هالمره
يندب ياعلي المضايق والمظلوم واليندب علي اشكد ينفتح صدره
عفيه اشكد عظيم انت يا ابو الابطال الجن والانس منك كلها متوشره
منهو غيرك شفيع النه يبو الكلفات لو قامت الساعه النه بنارها الكبره
يا ركن الرساله ويا بو ثاءر الله ويا اول القدره واخر القدره
يا سيف الفقر وقاري علم الغيب ويا بيرغ محمد ساعة الوزره
يالصنديد يالمثلك فلا موجود وكعبه الطلكت بيك مو حكهه مفتخره
عاشرنا طريقك باءول المشوار وبس ابن الزنا الينكر العشره
والله ياعلي من انخاك وقت الضيج اهومي اتروح كلها وتنجلي الحسره
محمد بالغدير اشكال للاسلام مو وصه بعلي بعده بالامره
ويتبره محمد منه يوم الدين كلمن ما حزن ليلة الطبره
علي وابنك حسين العجب الثورات بيرغ رفع راسه باءخر الثوره
حسين الماخذل دينه وكتاب الله اشلون يذل حسين وامه الزهره
نادى الموت اولى من ركوب العار وخله اجيوشهم على الارض مطشره
وابنك ابو فاضل بالغضب بركان ليث وبالشدايد محد ايكدره
سحكهه بالفرات وخله دمها ايسيل تمنيت الفرات ينشف ولا كطره
لان عطش جبود المصطفى الاحرار وعباس الغندر باليمنه واليسره
مهموم اشنكيلك حالي يا مولاي انا بصدري يحيدر غافيه العبره
توازت يا علي والباطل السياف والحق صار اخرس ونكسر ظهره
ما يخدر جرحنه ولا يريد ايطيب سم فرعون بيه الجرح شيخدره
الضلع طك وانكسر وختلت الاوزان ومهو غيرك غضنفريكدر يجبره
انا منين اشتكيلك ومن يا باب من هذا الزمان القاسي وغدره
حقدوا على النسل جيفن من علي الكرار اشجم هاشمي ايه الضيعوا ذكره
خلصنه انتهينه كلنه وين نروح وعيشتنه صفت يا عيشة الكشره
اشكد اسنين عشنه بعالم الاحزان كل يوم اليجي نتاءمل البشره
شجاه هذا الوطن بيه كثرت الرايات كلمن رايته ودستوره وقصره
وشجاه هذا الوطن يا وطن البترول الحراميه اتحوف ومحد اينطره









منقوله

[محمد السوداني]

سلام الله عليك امير المؤمنين على ع عليك مني السلام امامي واميري
الله قصيدة رائعه صح السانك وعاشت ايدك
اخي العزيز لك مني كل التقدير والاحترام يامبدع
تقبل تحياتي وبارك الله بيك

[ام فيصل]

مهموم اشنكيلك حالي يا مولاي انا بصدري يحيدر غافيه العبره
توازت يا علي والباطل السياف والحق صار اخرس ونكسر ظهره


السلام عليك ياحيدر الكرار

السلام عليك يبو الأئمة الأطهار


اخي هاشم هنياله اليدخل حضرة الكرار ويشم ريحة الزهرة

احسنت وبارك الله بيك وبقلمك الرائع قصيدة في غاية الروعة

وكلماتها تدق على اوتار القلوب

جعلها الله في ميزان عملك

قال الرسول الأكرم عليه افضل الصلاة والسلام (( ذكــــر علي عبـــــادة ))

[ملكة الاحساس]

السلام عليك يا سيدي ومولاي امير المؤمنين
تسلم اخي وبارك الله فيك على القصيدة الجميلة

[هاشم نجم]

ملكة الاحساس
منوره متصفحي
شكرا للمرور والرد
دمتي بالف خير

[حيدر القريشي]

السلام عليك يا امير المؤمنين
السلام عليك يا سيدي ومولاي
قصيده في غايه الابداع والروعه
شكرا لك اخي العزيز هاشم الورده
وتقبل مني خالص الود والتقدير

[هاشم نجم]

شكرا لمرورك وردك
اخي محمد السوداني
مودتي

[هاشم نجم]

حيدر القريشي
شكرا للمرور والرد
تحياتي