سلمتك حياتي

سَلـَمتـَك حياتي إستـَسلـَمِت بـِهواك
إوحَرَثت إلروح لوح إتفِيَك أشجــاره
إوشَگيت إلسِواجي إهروش روحي أنهار
سِمچَه إلروح صارت وإنتـَه سَحـاره
بادَلتَك حنان إوبادَلِتني إلشوگ
صَم چكليت حُبنا إشمَحلى طِشاره
طاش إلعِشِگ مِنـَه إوصار بيه مَزيون
وإلعِشاگ كِتبَت شِعر بأخباره
مو كِلمَن يِحِب گال آنا هَم حبيت
مايِشبَه نِثيث إلصيف مِزنَة رَعَد مَطاره
حبيبي إن مايِمُرني إيمُرني لَحظَه إبطيف
بَس إن غاب لَحظَه إسنين مِشواره
مِن يِزعَل حبيبي إبساع يِرضَه إوياي
يدري أطيه عمري إلزَعلَه كُفـاره
إوبَعد يِدري حبيبي إمن أزعَل أرضَه إوياه
إيدَغدِغ مِن يِسولف ناعِم إحواره
إلوادِم بالزَعَل تِتكَور إلشينات
ولفي إيشيل شوگ إوطيب بِكـواره
وِإن يِبعِد حبيبي إشما بَعَد مِرتاح
ساكِن وسط گَلبَه إوگَلبي خِطاره
حبيبي إعيونِه دَفتَر لوخِزِرتَه أقراه
بِعيونَه حبيبي إتبين أسـراره
هاي أطباع وِلفي وأرد أوصفَه إنوب
شَشرَح شَرد أوصف تِهبِل أطواره
مِن يِمشي حبيبي إتگول چَنَه إثنين
عازِل طولَه خِصرَه إونَگلِتَه أشباره
إولو حَل إلجِعِد خاچيَه على إلمتنين
شَمس إلگيض موجَة شَعرَه فَواره
لِگاح إلنَخَل طِليع عِندَه إسنون
مِن يِضحَك بَحَر مِن فوچ عَباره
رِگبتَه إتلِج بياض إوتِلمَع إمن إبعيد
سَراب إبصَحرَه قَحلَه إلرگبَه مَـواره
چفوفَه إتگول نِمرِش بين إيدَيَه إتذوب
وِإلبَرحي إستَحَه إشما نِصَع جُماره
بيَه آنا إلحبيبي إشما وِصَفتَه إعدول
كِل وَصفي شَذر ماصار بِسواره
بَس بيَه إلحَبيبي شوگ ماموصوف
قوافي إلي وِصَفني إبوصفي مِحتاره
بيَه أطباع شاعر مِن يِحِب إيهيم
إبكِل وادي يِدَوِر نَكهَه لَشعاره

م\ن

جميل جدا ... تحياتي يا مبدعة

شكرا على المرور يابروكان تحياتي لك