صـــــــــــــــدفــــــــــــــــــــــــة
صدفة
كان لقاؤنا صدفة..
يا نغمة سِحِر..
مرَّت على الساني...
أفكّر بيج لَيلي... إوْ هاجَت الحاني
شفتچ صدفة
بالقاعة . . . رقم "ما گول "!
من شفتچ . . . صرت مجبور بيچ آني
وگلت صدفة إوْ تِمر...
إوْ ليش أتـَعب الروح..
راح أنسى..!
ولا چَن سمعَت آذاني
عزفتچ وانتي غنوة..
إوْ حاولت أنساچ..
والحانچ سبتني ... وهزَّت أركاني..!
ما أدري الزمان..
إيعيدني لذكراچ...
وتدور الليالي... ونجتمع ثاني!
يا أوَّل حلم..
وآني بحلاة النوم !
مَر إوْ سكن عيني.. وكحَّل اجفاني!
ما أدري
قدَر..لو صدفة.. هذا الصّار
لو گلبي بهواچ.. إيريد يبلاني؟
و أحلى ايّام عشنا
إثنين متصافين
واشجانچ تِهب ْ. . وتهَيّج أشجاني
حبَّيتچ . . .
مثل ما حب ضفافه الماي
يا موتي وحياتي..إوْ فرحي واحزاني . .!
أنظملچ شعر . .
ديوان كل اسبوع!
مدري شلون أوصفچ...حرت بيچ آني..!
چنت گبلچ ثلج . .
غافي ابليالي إشتاي
لكن يوم شفتچ
ثار بركاني..!
وصل حد السّما..
إبثورة عشگ مجنون
ذوْبَت كل جليد الكون... نيراني!
د. هاشم الفريجي
رد مع اقتباس
رد: صـــــــــــــــدفــــــــــــــــــــــــة
رد: صـــــــــــــــدفــــــــــــــــــــــــة
المشاركة الأصلية كتبت بواسطة ام فيصل
