أمي رملهه الزمن وانه زغير

[أنثى شرقية]

أمي رملهه الزمن وانه زغير
واصبحت هي العلي مسؤوله
أمي باعت واشترت يم الرصيف
حتى ما تبقه العمر مذلوله
ومن كثر ما خيطت أمي اشوف
عالمكينه احلامهه المكتوله
أيد بيهه تخيط وتمسح دموع
وأيد تطبخ زادنه اعله الچوله
بالفرح أمي أخيره ابلا نقاش
وبالحزن أمي أكيد الأوله
اولأن تنعه هواي لجروح العراق
السان أمي امتيه الهلهوله
عليه والله تخاف لو عنهه أغيب
والوكت بغيابي عدهه اشطوله
أمي مو ساعات تحسبهه سنين
لو رحت يم صاحب ابتعلوله
وچنت لمن ألتحق أمي تموت
امنلبواچي وحيلهه يصيبه اهتزاز
ومن اكلهه تشيل وتضمه وتگول
هذا أكل اوليدي من ينزل مجاز
هواي صح ابيتنه اوياهه نصير
لچن وسط البيت احسنهه ارتكاز
لأن نطشر اذا عنه تغيب
مثل ما يطشر ابكسره الگزاز
ريحة امي اعله الورد والله تفوق
والورد يم امي كل عطره نشاز
أمي ما درست مسيقه اولا مقام
لكن امنتلولي تقراهه بحجاز
الجنه تسوه الدنيه سواهه الجليل
لأن سوه الجنه في أجمل طراز
واحترامن ألهه أم گلب الحنين
ربنه لمي انطاهه للجنه جواز
يمه ميله تصيبنه ابفگدچ أكيد
ويا هو بعدچ يعدلنه الميله
وموش حيل اولادچ الوحده يبيد
البيت يمه اعليچ بايد حيله
شيلتچ ما تنزع طول النهار
وما تفارگ حظنچ بكل ليله
ولأن متعلمين يم حظنچ ننام
يمه بعدچ نمنه يم الشيله
يمه دوياتچ بعدهي اعله الرفوف
حب ظغط حب سكر وتحليله
وصدگي بعده افراشچ بنفس المكان
لأن ما عدنه گلب ونشيله
يمه واحدنه أذا بالشدة طاح
الشدة عنه اتزول بس تدعيله
وچنه نشكيلچ اذا مر بينه ظيم
وهسه ياهو البعدچ النشكيله
**
الشاعر
احسان القريشي

[السومري71]

الأخت عيون المهى
لقد وضعت يدك على الجرح الكامن في قلوبنا والذي لايمكن ان يبرأ
فلا يمكن ان تكون هناك مصيبه اكبر من فقد الأم
ذلك النبع الصافي الذي يعطي دون مقابل
فجاءت كلامات الشاعر وكأنها تصف حالتي بالضبط
فشكرا لكِ ولجميل انتقاءك
خالص تحياتي

وانا اقرأ القصيده انهالت دموعي لانني كنت ارى امي بين السطور
لايسعني الا ان اقف اجلالا وتقديرا لهذا الجهد الرائع
وللابداع الذي ابديته اختي العزيزيه باختيارك لهذه القصيده دون غيرها
وفقكي الله

واسمحيلي ومن متصفحكي الجميل ان اخاطب امي رحمها الله

اخوتي من عكب عينج ولوني
وتغير شكلي يا يمه ولوني
قسوا مرحمو عبراتي ولوني
ييمه اخلافج اندارو عليه

[رنا العراقية]

عاشت ايد القريشي وايد الي نقل


الله يكون بعون كل ام عراقية مفارقة ولدها


الله يكون بعون العراق الي فارق احبابة

تحياتي

اختي الغاليه أشكرچ على نقل القصيدة والأمان الأدبيه الي تملكيهه وذكر اسمي تحت القصيدة واشكر جميع الاخو والاخوات الي مرو بالقصيدة تحياتي
اخوكم
احسان القريشي

[ابو سجاد الركابي]

الدهر حيل اوجر اويانه ولمنه
وبعد ما بيت يجمعنه ولمنه
عساهه ارواحنه الراحت ولامنه
تروح وتندفن حدر الوطيه
--------------------------
عيون المهى \حلوم\ رائعه في كل شيء\نقل رائع لقصيده معبره \شكرا لك وللشاعرالقريشي\\ تحياتي \\

[ابو سجاد الركابي]

رائع جدا ما نقلت\ شكرا لك عيون المها وتحياتي للشاعر القريشي\\\\\\\\\

[أنثى شرقية]

السومري الاصيل انها الام هنا فمابلك ان تكون الام العراقيه اصيله دوما
بطيبتها وحنانها وحليبا الطيب

**
عزيزتي سفيرة الشعر ممنونه لمرورك العطر
**
اخوي الطيب زهير العقابي
ربي يوفقك ويستر عليك وينطيك الصبر ايضا لفراقالغاليه
ممنونه لجميل تواصلك
***
رناوي غاليتي سعيده جداا بمرورك الجميل
***
اخوي وشاعرنا المبدع صاحب القلم المميز دوما احسان القريشي انا من المتابعين لكتاباتك القيمه
ويسرني انضمامك بين ركب الفرات
وممنونه جدا لجميل مرورك الاول حول قصيدتك الرائعه بحق الام
ربي يوفقك
**

شاعرنا المبدع ابو سجاد الركابي سعيده بجميل تواصلك الرائع وانت الاروع خويه
ربي يوفقك
تحياتي لكل من مر من هنا وشرفني بحضوره الجميل