معـــــــــــــــذور الغــــــــــــــــــــــزل
من شافه انصدم واتأذه بالصدمة
حته الابجدية انتفضت بكلمات
وسوت انقلاب الكلمة ع البسمة
ويا كلمة التشوفه تضم نفسها بساع
تخجل من جماله وتنتهي الكلمة
ضاعت كل اساليب الحروف وياه
لان شايل حسن محد تره يفهمه
اذا يزعل علي اختنك من الاه
ويركض كلبي رأسا يركض يضمه
واذا يضحك يبوك همومي مني بساع
ويتحول ورد كل ساعه اشتمه
واذا يبرد اوج ضلوعي كلها بنار
وادزهن ويه كلبي ونحترك يمه
يا شعره السرح من ينتشر جن جيش
يكتل ابرياء وكلشي ميهمه
مشكلته اعتقد مو بالعمد يغتال
بس من كد جماله انثبتت التهمه
يا بحر النظر مو عين عنده تكول
تجدح بالسحر وتلون الظلمة
وبخدوده الشمس تشرق واظن تغيب
وبالكوه يتنفس من صغر خشمه
اسكر من ابوسه شفافه خمرة تين
وانام وانتظر يحلم ... واجي بحلمه..
قارورة عطر جسمه ويفيض عطور
وجسمه من العطر ظل دايخ بجسمه
كسر حته الجمال ودخل بالتاريخ
وموسوعة غينيس خطت ذهب اسمه
لأن هو الوحيد اليحجي وي الاحساس
ولأن هو الوحيد اليشبه النسمة
ولأن هو الوحيد العنده هالة نور
ولأن وحده العليه كلوب مزدحمة
ولأن هو الحسن والرقه والاخلاق
ولأن اجمل صفات بطبعه ملتمه
اذن زايد جماله وزاد فوك الناس
ومحد يوصله وماواحد يلزمه
اريد انه انتحر وبجسمه اموت اليوم
وماناقصني بس يبريني الذمة
.......................
مماراق لي
رد مع اقتباس
رد: معـــــــــــــــذور الغــــــــــــــــــــــزل
