ابوذياااااات روعه اتمنة تعجبكم

جمد كلبي على بابك مو عجيبه
عجبته وكلشي غيرك مو عجيبه
تره السبع العجايب مو عجيبه
صفر وي كارثه فركاك اليه

الوكت تعبني والمصرف والايجار
والغيري الدهر منصف والي جار
الى صاحب ردت ودة والى جار
يواعدني يجي ومامر علية

سلطه وجاه الك يمي والك مال
كلبي ماعشق غيرك ولك مال
الله يساعد الراسب والاكمال
والناجح الف رحمة على ابية

دمع عيني يحلو الطول هامل
شجاك الحبي يالمحبوب هامل
اذا فد ازعلك كول ها.مل
امل منك جذب يلعشت بيه

اجيت ولجل عينـــــــك شاركتلك
وعله دموعي دليلـــي شاركتلك
بخت عنــــدي واحذرك شاركتلك
اشور بيك مــن تبعد عليـــــــــــه

اريد اكصد لعد كلبك وظــــيفه
واحط حبي على حبك وظيـــيفه
اذا هذا العشك صاير وظــــيفه
ما اطلع تقاعد للمنيه

الحزن لاجلك هويتة صار مني
وليالي هواي بعدك صارمني
شتريد الكلب؟ اخذة صار مني
اخذ شتريد بس ارجع الية.....

صخر ما اذوب بس كوة اذب لك
سكيتك وانا بيدي اكدر اذبلك
يكلبي انوب اذا تعشك اذب لك
نفط وبنار احركنك بدية 0000

صرت كلعود انا بكبرة ورفعة
مشيت وما دريت امشي ورى افعى
اذا شخصك يطيح اركض وارفعة
من اطيحن ليش ماتركض علية
0000000
بعلاقتنة منو الخربط وشر بك
وجنت بيدي اوكلنك واشربك
حقد شايل علي كلبك وشر بيك
وتخالفنة وحلم نرجع سوية
0000000

جبل ما الوذ والحب لوى اذاني
وحبيبي ارضى باذيتة لو اذاني
شكثر جف اعلة حبك لوى اذاني
اتوب وتالي ارد غصبن علية

الكلب معلول ومأيس من شفاه
وعلى خدودي الدمع جاري من شفاه
على الراح وحرم شفتي من شفاه
وكطع حته بحلم ما مر عليه

روح ابعيد عني......ولي يله
وعلي من السمه منزل ...ولي الله
حبك سم واجرعنه ....والي الله
وتدير السم بديك شلون بيه

طعم شفتك حبيبي عسل ...وي جوز
ومنك ما يمل الكلب ...ويجوز
يمر طيفك علي كل يوم ....ويجوز
يظل وياي لحد المنيه

نسيت وتيهت روحي وهم بيك
وحسافه العمر خلصته وهم بيك
خويت وضيعت ناسي وهم بيك
اطلعت جذاب وهم تضحك عليه

شكيت وكوه جبت الراس (عراس)
وبدي تاج الوفه لبسته (عراس)
عفته اليوم ثالث يوم(عرس)
وخبر عرسه الشماته انطوه اليه

شهد شمام شربت شكر شفتك
شهد شلزم شعوفن شكض شفتك
شهد شاهد شهدلي بيوم شفتك
سلب روحي وتركني للاذيه

ادك باب اليضربك واشتمنه
واشيل تراب جدمك واشتم منه
كول أمرني حبي واشمنه
حاضر لو ردت روحي هديه

اولي وماكلتلك ولي ساعـــــــــة
واحن لنار هجرك والساعـــــــــة
اذا لحظات اشوفك وله ساعـــــــة
احس بيك الزمن واكف بديــــــــة

المسه كتله صباح الخير ....وبراك
اتمازح كال لولا اتوخز ....وبراك
كلت لا والذي صورك .... وبراك
بجبينك صبح ظنيت المسيه

بهيمه ياظعن شوكي وناخوك
ونادوك اعلى كل محنه وناخوك
عضيدك آنه بالشده وناخوك
واصير احزام ظهرك للمنية

يجرحي شكد اشدنك والافلاك
انة ادري بهيمة ومضيع والافلاك
نجوم الليل خل تشهد والافلاك
انة الميت اليمشي اعلة الوطية

الف دنياي كلهة ماتلفني
عنيد وغير شخصك ماتلفني
عمت عين المنايا ماتلفني
الف دنية ومرة تلعب علية
__________________

(( منقـــول ))
ارجو الإطلاع على هذا الرابط للأهمية وللأمانة الأدبية
وللمرة الثانية
http://www.alforat.org/showthread.php?t=22548

[الشاعركريم السلطاني]

شكرا على هذة الابوذية الرائعة
السلطاني

بارك الله فيك
روعةةةةةةةةةةةةةةةة

[سلام الدراجي]

تسلم اخي علاء
ابوذيات غايه في الروعه
دام لنا نبض قلمك الرائع
تقبل مروري واحترامي