قصيدة "ريت حيدر" للحاج زاير بحق الامام العباس(ع)
ريت حيدر كربلا بيها يشوف
شلون ابو فاضل لكدها علالصفوف
من لكدها وصار خطاف النفوس
ارض ما تنشاف بس متروسه روس
صار اهوالعريس والكون العروس
وهي تثنى ومبسولة الزلوف
اتبسمتله ام العلى لجله وتموج
وكربلا كلها من ابو فاضل تلوج
الشرد منع والمصوب يلوج
كثر دمها وجرت وديان الطفوف
الطفوف اتسيل من سيفه المخيف
وروجه جنه الحوم لجناحه رفيف
من ركب وان شاف صارلهم رجيف
شبل حيدر بالحرب يومه معروف
كلهم يعروفون الباري صلطه
ويه رمشه عين غطهم ما بطه
صكر وتلولح عله سرب الكطه
وفرت بجنحانها ذيج الرفوف
رفوف طارت هجت من ابن الفحل
واصوات صارلهم مثل دوي النحل
صار يتهلل فرح ذاك المحل
مطرب وباسم على لمع السيوف
ارواح يخطف يشبه الداحي الباب
وحرب ابو فاضل مثل يوم العذاب
ومن وصلهم هدد اعبارالركاب
ولو اسكندر ماكدر للدم يروف
من يروف الدم وابو فاضل فزع
وسيف اله بالكون جم لمعه لمع
اشحال قلب حسين يوم الي وكع
كعد يمه وشافه مكطوع الجفوف
اجفوفه مكطوعات والراس انطبر
وسال دمع حسين يشبه للمطر
صاح ياخويه انكسر مني الظهر
يا كمرنه شلون غطاك الخسوف