بقلمي-ومضات منوعه
{1}
شمش نص.... الليل ياضي العليك
مشعشع اعله الگاع ومضوي السماء
أدسون ........وداعتك لو يدري بيك
ابد ما سوه....... بحوث الكهرباء
ُُُُُُُُ
{2}
أمري لله وياك... عشت انه بوهم
ما چنت أدري بمحبتك خادعه
لان گلبك بالهوى..... مثل الاصم
حته لو مدفع يدگ ما تسمعه
ُُُُُُُ
{3}
أجرَحت گلبي ....وگلت مو انته چذب
هذا حال المبتلي .....بحكم الهوى
ومن جرحت أحساسي ما أعذرك صعب
الجروح أشكال... مو كلها سوى
ُُُُُُُ
{4}
أهواي وصفوا بالجمال وسولفوا
وبجمالك بالشعر.... محد وصف
مو قصدهم بالوصف همّه أكتفوا
بس مبيهم واحد بوصفك عرف
ُُُُُُ
{5}
رحت للدكتور وصفلي عسل
أويّن الگه... احسن من أوصافك
بشفتك موجود أدريه البدّل
وجاي أضوگ انه العسل بشفافك
ُُُُُُ
{6}
آسف ماأگلك حته لوغلطان
روحين بجسد والغلطه مسموحه
أذن انته أساسا مني ما زعلان
أكو واحد يجي يتاسف الروحه
ُُُُُُُ
{7}
الشعر والذوق في نقطة تلاقي
صوره مرسومه الشعر مو ظاهري
لاتقارن اي شعر ويه العراقي
لأن كل صوره. أصلها سومري
ُُُُُُُ
{8}
آخ من هذا الزمن كله عذاب
ما يدور غير بس ....أضراري
حته بفكاري اذا أقره كتاب
هم يجي يشوش عليه أفكاري
ُُُُُُُ
{9}
الصبح لتروح إلا...انته وأبوك
آنه ما خايف عليك من الحسد
الناس جوعانه وأخافن يشتهوك
گيمر بخدك... وبشفافك شهد
ُُُُُُُ
{10}
انته عنواني صرت وأنته هلي
بعد عنك لا تصدگ.... أسالك
گلبي عندك صار ما تشتاگ ألي
ولأن صار وياك ما أشتاگ ألك
ُُُُُُُ
{11}
حسنك من الشرق الاوسط
انته ما يحتاجلك اي تزكيه
الشيخ من ششافك تخربط
قره موال أبمكان التزكيه
ُُُُُُ
......
.....
.........كلمات
ناصر اسماعيل الموزاني
رد مع اقتباس
رد: بقلمي-ومضات منوعه
