عاتبيت الدهر وعيونه تشوف..
وين مايلگه الحزن ذباني
الوكت دولاب حط روحي ويطوف..
شالني الحد السمه ودگاني
چن حمامه وطاحت بحضن السيوف..
الرحمة السجين باقي متاني
صار شعري تراب مرمي اعلى الرفوف..
وبس دواليب الخشب تقراني
چن جنح طيره بسمه وحل الكسوف..
وليل چلچل وبقهر وازاني
مسودنه الريح وقست بيه الظروف..
والهوه العالي كسر جنحاني
گول هانت طحت والشامت يشوف..
وصعبه كلش لن درو عدواني
معاتت اويه الروح گوه اوگف اوگوف..
خيط للسبحه الوكت خلاني
حال غرگان ابعدت عنه الجروف..
تروح روحه وللنسيم متاني
وشدت الدنيه خصر واعلى الدفوف..
چفوفهم تلعب لعب خواني
گبال عيني سيوفهم وگفت صفوف..
النسمه منهم لو تمر تعاني
وظنو ارجف ركزو بس عالچتوف ..
الهوه عالي وحركالي رداني
وما رجف رمشي وكتايبهم تشوف..
الطير فوگي مخلي عشه وباني
مره وحده بنادم بعينه يشوف..
الموت واحد ماكو موتن ثاني
الدنيه عافت ياختي بس ما اعوف..
استخطه چفهه ومو غصب عافاني
ما اردينها جبن عني تگول..
صعبه خزرة شاة ترعب بالسباع
صعبت وقفلت بعد ما مش حلول..
ولا حوار يفيد لا لين الطباع
چن قصيده وصعبت بوكت الدخول..
وحاضره الفكره القلم من عدنه ضاع
اليدگ باب النار من عدهه شينول..
وهوه چفه اوراق شايلها الذراع
النايبات بخاطري تصول وتجول..
وصابرلهن چن خلگ والروح گاع
لني ادري بشامتي محضر الطبول..
وما يمل سنين لو طال الصراع
لو لگيت الاسد گاضيه النحول..
گول رگصت فوگ جثمانه الضباع
وكحه كلمات الحياة بلا اصول..
وما تعرف ودادها من النزاع
راكده سنيني واخافنها تطول..
وآنه ما اهوى الحياة بلا ضياع
صافنه الدنيه وره الصفنه شتگول..
الريح تـتعب بس يكيف الها الشراع.
