اسئلك عن جمالك---بقلمي

اسالك عن جمالك كلي هذا منين
ما شايف بشر يحمل هالاوصاف
ما مخلوق مثلي اعتقد من طين
لئن مثلي شفت الاف والاف
عينك كون والكون انجمع بالعين
ذبحني الحواجب والرموش اسياف
دليني عليك متيه من سنين
صدكني من اشوفك يله انشاف
من اية جمالك تدري صار الدين
يا كعبة عشك حج بيهه كلبي وطاف
من رمشك خلق تدري الله حور العين
ومن شفتك ورد مخلوق تدري اصناف
جمالك منه واحد ما يصير اثنين
لا تقبل طرح لا قسمه لا تنظاف
لا تمشي بطريق اتصفن الماشين
خطيه الناس منك رايده الطاف
من تفوت ظهرك يسحر الصوبين
جا شيسوي وجهك كون يلتاف
عجيبه شلون تمشي جبال بيك اثنين
مغطيتهن ترافه مغلفات غلاف
بيك الله ابتلانه ودوخت جيلين
حكهم بيك داخو حيل شفاف
يوسف لو يشوفك يبصم بعشرين
لئن كل حسنه ما يوصل للشفاف
بقلمي
محمد الحميداوي

الله الله ياشاعرنا المبدع جميل والله وبجد وهنيال اللي وصفتها
عاشت الايادي يامبدع
لك مني كل الود والتقدير

اشكر مرورك الذي عطر متصفحي اميره اشكر هذا المرور الرائع تقبلي ارق التحايا

الله على هالكلمات الرررررائعة مبدع وين ما تكتب

اشكر مرورك الصابره والله اشعر بالخجل من اطرائك الجميل اشكرك من كل قلبي تحياتي لكي يارائعه

جهود مميزه
اتمنالكم التوفيق والابداع دائما

اشكر مرورك الكريم اخي الشايب تقبل مني كل الود

المبدع محمد الحميداوي أتمنى لك دوام الموفقيه والابداع