طيبة عراقية ........بقلمي

أنه طيب وأستحي وخلكي طويل
وبيه عزة وزود من طبع النخيل
مرة من تجذب عليه أتحملك
ومرة أعذرك أرد أسويلك جميل
لكن من يزيد حدك لا فلا
راح تلكاني فحل يهوى الصهيل
وراح أدك روحي أعله دربك لافتات
وأكتب بدمي ألف أيه ودليل
وراح أعلمك طيبتي لياحد تكون
وأشكثر بيه قيم وأشكد أصيل
أحذر ولاتحجي في ظهري وتكول
لازم انقوده لان ماله بديل
أنه علمت النقط وين الحروف
وأنه ذوبت الصعب والمستحيل
وأنه سويتك أسد لاتنسى ها
ترى من تنسى أرجعنك ذليل
حاذر أطباعي ترى بطباعي نار
وراسي حار ومثل عباس الكفيل
هيج هذا الكرسي نساك شتكون
وجاي تجرحني وتجوعني وتعيل
أنه راح أنطيك أيه من البيان
تفتهم ماتفتهم أنته الوكيل
أنه من جدمي لحد راسي عراق
وأنته من جدمك لحد راسك دخيل
أذن تتأدب أذا تحجي معاي
وكوم أوكف للشعب وأسجد طويل
وأشكر الله لخله بيدك مي فرات
وأغسل بدجلة وتيمم بالنخيل
ولاتكول أنقودهم نخدم تكول
وكول تحت أقدامهم رحمة وجميل

ملاحظة ......التصريحات التي تقول أن العراقي (غشيم) وما يعرف يتصرف .!!!!!!!!!!!كتبت ذلك ...



الشاعر
يحيى الحميداوي
21-2-2011

والله يااخي العراقي
فحل من اولاد فحول والي يعتقد غشيم
اصور هو غشيم ابن غشيم تحياتي لنبظك
الراقي يالغالي الحميداوي
كن بالف خير
يالغالي

تحياتي لك ياعراقي يااصيل صح لسانك وعاش قلمك

كلمات راقية تقبل مروري مع كل الاحترام

تسلملي حبيبي يحيى الحميداوي على هذه المشاعر الوطنية النبيلة...تحياتي الك شاعرنا المبدع.

صح لسانك وبارك الله فيك
وهذا هو طبع العراقي اصيل وصبور بس موغشيم كما يحاول البعض النيل من كرامت واباء هذا الشعب العظيم
تحياتي وتقديري لنفسك الوطني وروحك العراقيه الأصيلة

الاخت فاتن وهيب ...
شكرا لمرورك الكريم ونفسك الطيب
تحياتي

الله يا يحيى ...
قصيدة رائعة بطعم الشعر يا شاعر..
لك كل الود.....

الشاعر الرائع
والاخ المحترم
جلال البطاط
كلماتك شهادة أعتز بها من شاعر جميل ورائع
تحياتي