إليكم مجموعة من الإبو ذيات
وارجوا ان تنال اعجابكم
777777
777
7
روحي من الهجر ملت .... وسالت
عليه احباب لانشدت .... وسالت
الف دمعه الجرت مني .... وسالت
ولادمعه الجرت منهم عليه
عقد ياقوت ذرعانك .... وفضه
على المخلوق طش حسنك .... وفضه
حسابي وياك اريد اكعد .... وفضه
واحجي العلي والمو عليه
اخذ گلبي حلالك .... وانتحر بيه
اخذ دمي وشرايني .... وانت حر بيه
سم بالماي احطن .... وانتحر بيه
ولا غيرك يمس اصبع من اديه
بعتني و اني احبك .... و انت شاري
حبيبي انت شهرتي .... و انتشاري
على يا قبله ذبحتني .... و انت شاري
و حتى بسم الله ما سمه عليه
طعم طيبك يغالي عسل .... وي جوز
ومنك مايتوب الكلب .... و يجوز
تريد انساك بس بالموت .... و يجوز
تلمنه الاخره ونرجع سويه
ابد ما اصطبيلك .... وانتبهلك
وحذر حيل مني .... ونتبه لك
انه ابهلي ازامط .... وانته بهلك
اذا اهلك زلم هدهم عليه
وحك من ضافلك نكهه .... وحلاك
اشدك وكت ماريدك .... وحلاك
روح العب ويه البعمرك .... وحلاك
تره ويانه العب صدك اذيه
ذبل هرش الكلب لاجلك .... وخاوه
وطمع ما ردت منك .... وخاوه
الفخر مو للذي عاشر .... وخاوه
الفخر للطيب اليذكر خوييه
هجم حبك على سنيني .... غزلها
وروحي بمغزل الحسره .... غزلها
القصايد بس الك لايك .... غزلها
شكد افرح اذا تسأل عليه
ملون هل العراق وصار .... عادي
وخسر كلمن أجانه اليوم .... عادي
بينه شما تمر صعبه .... عادي
رضعنه رصاص ومن البندقية
خلافك الدنيا وحشه .... ومره
ولا منك بعد جيه .... و مره
صورتك مره اضمنها .... ومره
اشوفنها وتوج نيران بيه
ياصاح شلونك بهجري .... وانه بعيد
لاجلك البس الاسود .... وانة بعيد
تكلي حيل احبنك .... وانة بعيد
اكرر والصدى يرجع علية
أظل أكتب شعر للطيبين .... وأنشد
وأسأل على الصاحب دوم .... وأنشد
وأصير حزام وكت الضيج .... وأنشد
لكل عزيز وغالي عليه
افكر بيك يا حبي .... ولا انام
ولا غمض جفن عيني .... ولا نـام
احب اكعد يمك .... ولا نــــام
بعيد وشوفتك حسرة عليــة
وحك التين والزيتون .... والمن
اجروحي الطابن امن اسنين .... ولمن
السدر والجفن والكافور .... والمن
كَبل طرت الفجر يسرون بيه
نحل جسمي وزاد اليوم .... مرضاي
على اللي ما شفت له شخص.. مرضاي
لو بات الترف بحشاي ......مرضاي
اكَله اكَرب يهل مبعد عليه
يعاذل نار شوكَي هل ......تمسني
إهديني الشوف حبي ....والتمسني
بجه من مد يمينه ........والتمسني
لكَاني نفس ما مش جسد بيه
الزمان وي الجواد بسكَم.... كَصرن
ويبني بيوت للأنذال .......كَصرن
الكَصير يطول وال بي طول ..كَصرن
الصكَر يطلب من البومة هديه
نحل جسمي وتظل روحي ...تعالي
هبطنه والنــــذل بينـــــه ....تعالي
يجارة الدهر ما انصف .......تعالي
نخلط همومنا ونجسم سوية
