هلبت !!!
هلبت بخت بينه ؟؟؟
وترد ليلينه
ونكحل اعيون الوكت
ويعود ماضينه !!!
ضاعت امانينه !!
وانختمن اسنين العمر
تالي العمر ذلينه !!
***
هلبت ترد دنيانه ؟؟
ويردنه من ودانه
ياباب ادكنه ويرد ؟؟؟
جثير ابواب دكينه !!!
ضاعت امانينه !!
وانختم كل تعب العمر
جف الاه يلوينه
***
هلبت تملنه الاه
والضاع لونلكاه
ويجيس حركتنه البرد
والباعنه ايشارينه !!
ضاعت امانينه !!
وانختم كل صبر العمر
نحصد ندم تالينه
***
هلبت تعود افراحنه !!
وينسمع ذاك اصياحنه
احلام ماتت بالفرج
مابين دهله وطينه
ضاعت امانينه !!
وانختمت ارياح الوكت
تاخذنه وتودينه
***
ماظل بخت بينه
ولاظنه ظلت بالوكت
يعدل موازينه
ضاعت امانينه !!
وانختم كل ضيم العمر
بيد الظلم ظلينه !!!
*** بقلمي ***
