السلام عليكم:
أصدقائي الأعزاء اليكم
قصيدة أخرى من قصائدي المتواضعة
وهي بعنوان :
(هذا الدليل)
تسألني لو چنت أحبك شنهو الدليل؟
أنت بس أسمعني و لا تقاطع
وآني أقدملك مو عشرة مية دليل
شتسمي ألي يعيش العمر لأجلك
وشما تميل رياحك يميل
وشتسمي ألي حبك سكن گلبه
وبغيرك أبد ما يرضى بديل
وشتسمي اليعتبرك أنت دنيتة
وأنت أله الصاحب والخليل
وأن چان بعدك ما مطمأن
وبعدك تسأل عالدليل
لا تسألني آني
أسأل طيور السما
أسأل النجمات والليل الطويل
أسأل أزهار الربيع
أسأل الأشجار وسعفات النخيل
وأنت تعرف شكثر أبعثلك سلام
بكل وسيلة وكل سبيل
وأن چان بعدك ما مطمأن
وبعدك تسأل عالدليل
شوف ألي صايرلي بدونك
شوف الجسد مني صاير نحيل
الدموع بهجرك ما تفارگني
دومهة عالوجنة تسيل
هذا حالي بدونك
كل جزء مني عليل
وأن چان بعدك ما مطمأن
وبعدك تسأل عالدليل
صدگ أني شوفتك عيد أعتبرهة
و وياك أنا أرضى بالقليل
كل كلمة منك هدية
وكلشي من عندك جميل
ولو زماني يمطر علية هموم
بس طاريك عني الهم يشيل
وأن چان بعدك ما مطمأن
وبعدك تسأل عالدليل
أسمعني شراح أگول وأنت أحكم :
أنت وحدك ساكن بگلبي
وحبك أبد ما له مثيل
ولو ردت أوزن حبي للأحبهم
كل الموازين تخف،وبس أنت ميزانك ثگيل
ولو نسيت الدنية كلهة
أنساك أنت مستحيل
ولو قررت عني تبتعد
من هالدنية أنا أتمنى الرحيل
دنيتي بدونك ما ألهة طعم
ومن غيرك أعيش آني ذليل
وهسة أحكم
بعد كل هذا السمعته
هم بعد تطلب دليل؟؟؟؟؟؟
*****************************************
أتمنى ان تعجبكم
ولا تنسوا ان تزينوا الصفحة بردودكم
وأطراءاتكم القيمة
تقبلوا تحياتي
أختكم
سراب الماضي
:66 (46)::66 (46)::66 (46)::66 (46)::66 (46):
