عدى النهار .. والمغربية جاية
تتخفى ورا ضهر الشجر
وعشان نتوه في السكة
شالت من ليالينا القمر
وبلدنا ع الترعة بتغسل شعرها
جانا نهار مقدرش يدفع مهرها
يا هل ترى الليل الحزين
أبو النجوم الدبلانين
أبو الغناوي المجروحين
يقدر ينسيها الصباح
أبو شمس بترش الحنين ؟
أبدا .. بلدنا ليل نهار
لما يعدي في الدروب
ويغني قدام كل دار
والليل يلف ورا السواقي
زي ما يلف الزمان .. وعلى النغم
تحلم بلدنا بالسنابل والكيزان
تحلم ببكره .. وللي حيجيبه معاه
تنده عليه في الضلمه وبتسمع نداه
تصحى له من قبل الأدان
تروح تقابله في الغيطان
في المصانع .. والمعامل .. والمدارس .. والساحات
طالعة له صحبة .. جنود
طالعة له رجال .. أطفال .. بنات
كل الدروب واخدة بلدنا للنهار
واحنا بلدنا ليل نهار
بتحب موال النهار
لما يعدي في الدروب
ويغني قدام كل دار
عدى النهار
كلمات / عبدالرحمن الابنودى
