الحبرجل
أضل ألخاطرك اكتب يغالي أشعار
وگلبي ألي اليحبگ والله ما ناسيك
ولان گربك علي مثل ألچفن للعين
واگرب من چفنه اقسم امخليك
ولان أنت ألإمارة واحنه لك حراس
ندفع بالهوة كل خوفنه ايأذيك
ولان جلدك أظن ينخدش من الماي
يعني برقتك ما ينوجد ثانيك
إهلالك من يهل أيغير حركت الكون
مد وجزر يگلب من يمر طاريك
من اكتب قصيده المطلع أنت أتكون
صرت حمداني سيف وانه متنبيك
يالطولك ثلج بس ما تموع أبساع
تتحدى الشمس لو رادت أتعاديك
يل عينك سهم ترمي وتصيب اگلوب
يل عشگ بحر والسفن تغرگ بيك
من تمشي الحبرجل چنه شبه الطير
ومن تخزر زلم ما تكدر أتلاگيك
ورصعه البلحنچ آتگول خرزه ماس
وادري الماس غالي بروحي انه أشريك
حدر زيچك سهل ممدود مدري الوين
ونقط تفتيش بيه ويا هو اليحاجيك
خطر كلش خطر مرسوم بالعظمين
وخط احمر أذن ألويله اليدنيك
يعني الموت حتما چثه ما يلگون
ونياله اليموت وهو بين أيديك
تبقى أنت الحسن مقياس بين الناس
يدگ چفگ وزن والناس تشهد بيك
يل سومر جمالك بابل وعشتار
يعني أنت الأمير وتاجك معليك
وأضل أتغزلك بس الوصف معذور
لان ضاع الوزن والشعر گلي شبيك
الشاعر
سلام الدراجي
***********
