أفطر ياجرح حل وعدك اليوم
هاي سنين تاني وعد خلانك
لجلك والكريم بكفه خلاه
رمضان البشر وبكفه رمضانك
أفطر ياجرح لاتنطر العيد
حتى العيد لابس ثوب احزانك
بشاير فرحتك من عرضة الطير
ويه الفجر تنغط غدر عدوانك
أفطر ياجرح سيل أحضن المحراب
صلي واليأذن صوت شريانك
بكل حيلك دخضب هاي من هاي
دليل أثبات حطه الباري لائمانك
أفطر ياعلي مرخوص هذا اليوم
لكل الماوعوا جدمت برهانك
متربص تحس بالغدر تانيك
آويته وغمرته بجود احسانك
بمحاكمها لجتلك مالكت غير
حاكمها بمخافة الله من دانك
وأنته بالمنيه وترحم الغدار
ألغير العدل ما مال ميزانك
دواوين الغدر بالشام للا قداح
وللمحتاج ظل مفتوح ديوانك
الذله الباري الها اختار عنوان
وساحات الشرف والغيره عنوانك
ماخنت العهد حاشاك لا والله
مات بحسرته ياعلي من خانك
شكيت الجدار بيوم طلكت بيك
وشان الكعبه من يومه صبح شانك
بيبان الشرك ذليتها بيمناك
وبالشده درع للخاف بيبانك
أنهدت من غبت للدين اركان
وحين الغاب ظلت سالمه اركانك
غدر بعض الصحابه بين الضلوع
ظميته ورفض طاريه وجدانك
كتمته ولا شكيت الصار وياك
ولو مثله جبل ماحفض كتمانك
على أمة محمد خايف تضيع
وارباب الضغينه تهد بنيانك
تحريف المناهج الها ميدان
تردها عن غرضها صار ميدانك
قرآين شكثر جمعتها الاصحاب
مشكوك بهواها ألّه قرآنك
غفران الكريم بيوم الحساب
مشروط بيميني يلكه غفرانك
تظل أتلوذ أبابك مساكين
ويظل فايض على الامه حنانك
وأظل أرجه وأناجي باري الكون
يعفر جبهتي بالموت تربانك
*********************
تحياتي للجميــــــــــــــــــع
أخوكم توفيــــــــــــــــــق
