عشت ابيت فارغ لاسطح لاباب
اذا غيمات مرن يرتبك وظعة
اكولن بيت اخجل ياعراق الخير
فشله ادري الكلام الوادم اسمعه
وك يابيت هذا المايششوف النور
وبصمك يعوز كونك اجمعه
حته النار تخجل من اوج النار
والهسه البرد ضل مجمن بضلعه
من يوم السكنته الجوع هل خطار
اذا تمرات عندي وخبزه شيشبعه
وذا دنياي مطرت من حدر للماي
هو الغيم سكفه الماي شيكعه
اسمع بالنفط وبيتي ضل فانوس
مامره اشتعل وتانس بربعه
متوهم جنت عندي وطن ضنيت
صوج اهلي وبينت خدعه
ليش انه تجاوز ساكن وهالناس
كل واحد قصر بانيله لو قلعه
فوك الجوع ذاك وهم اضل جوعان
حته الراد يحجي المنصب يمنعه
انسداد امعاء كالو عندك اتعشيت
كتلهم خطب كالوهه بالجمعه
وكتلهم رحت افتر عله الحيطان
المن ياشعار البيه اظن نشعه
احسنهن طلع بس بالذبح جوليت
يعرف من تلوجه الموس شيبلعه
