الطيبة أصلي
شلون أتريدني اعلگ صواني شموع
ودمعاتي أعله خدي بللت صدري
مد حبل الوصل وخل ترجع الأيام
من فرحي اخلي دموع مي تجري
تدريني أموتن من اسمع بطاريك
قدري انه الاحبك وأنت هم قدري
عالم سرك انه وتدري بيه أسرار
ولغيرك ابد ما ينفتح سري
محتاجك نظر ودموع وسط العين
وشلي أبعيني بعدك يابعد نظري
بالنت أنت واشعر بالسعادة وياك
ومن أنت ازعلت طيفك علي يمري
من تكتب أيديك أتذوبه للكي بور
ناري وتشتعل وبگلبي هم تسري
شلي بروحي بعدك يابعد هالروح
مو أنت ألچنتلي أحزام لبظهري
دفيني أبحنانك ضمني بين أيديك
وكتبلك غزل من حيث لا تدري
وأحلفك بالألف والدبل لام وهااا
انسه هالجرة وتقبله العذري
ليش أنسيتني وشمتت بيه الغير
وطعنهم بالظهر والسهم شگ صدري
منك وأسمعته (الطيبة اصلي )ابزود؟؟
واقسم سرك المنفضح وي سري
وافتحلك اگليبي وشوف جرح البيه
وقدملك نذر شتريد من عمري
الشاعر
سلام الدراجي
