دير بالك راح اموت
راح اغمض عيني هالمره واموت
وراح يرتاح الغرام
من المحبه
من المحنه
من الصراخ
من السكوت
دير بالك راح اموت
وانه ماراضي عليك
من تهزني
من تسافر
من تروح
ومن تفوت
دير بالك راح ......
راح اكلك
لاتجيني
خاف أعدل من تجيني
خاف يحييني حنيني
ياترى هم بيه احبك
مثل ماحبيت اول
ومن اشوفل تحتفل
بدموع عيني
وتشتعل رعشه اديه
وماالمسك
خاف اموت
دير بالك كلشي بيه اليوم ذابل
حتى صوتي بلايه صوت
وجني لوحه اتعلكت ابسمار دربك
وجني لعابه تهزهه تصيح أحبك
وجني طير بسفره طول
جنحه ميعينه يكمل
ماكو قوت
اعتقد هالحب اللهي
والدليل اشصار بينه
واحنه كل فتره انتلاكه
وانتعاتب بالنواظر
كلمن اطفاله عله صدره
وبعده يتخيل شملنا
يلمه باجر
العشك اكبر نحسه
من ظروف وقسمه ضدنه
موشرط نبقه سويه
المهم تبقه المشاعر
والمشاعر ماتموت
دير بالك دير بالك
راح من حبك اموت
