طفح بيها الزعل نهرين لمـّن
غازلت سمره
تـنحّت والدموع اتسيل
حرگت جوري خدها وگاعها الخضره
بعد واطرافها من الغيض
ترجف والشفايف يبست ابزفره
وَصِِِِـدْ اِلهه وأحس بركان روحي
ايفور بيـّه وياكل ابصخره
وحسـّن حدري شبـّت نار
والگاع اصبحت حمره
تفجـّر بيه بركاني وتوذر چبدي الف وذره
تطاير مو لحم ياناس جمره اتشب باثر جمره
حرگ كل السلف باحشاي
حتى اخيام گلبي الساكن ابصحره
ولاغيمة جفن ياناس
بعيون الحبيب ويفزع ابمطره
ولاخيـّال لاح من الطرايف
لاظهر مهره
وجتني الريح اجتني الريح
بتراب السنين امحمله وصفره
هواهه اسيوف بجروحي ورملها املاح
هبـّت من ارض قفره
ولاظِل اليظلني وبي تلوذ الروح
لانخلات لاشجره
ولاربوه التلوح ابعيد لاشاخص گبر
واتمدد ابكتره
وصدّن *** لن اشوف الليل ***
بعيون الحبيب ايغيب
گطره اتجرجر ابگطره
مثل طير الهدل جنحه وغمض جفنه وغفه ابوكره
اصدن *** وارتفع عامود***
من رمش الحبيب ونـوّر ابفجره
أصد اولن اشوف اچفوف ترفه امتدت ابحسره
اجتني ولملمتني اعظام *****
مسحت جفني ذاك المترب ابنظره
توچـّيني وأطيح اردود
وتعود وتلمني ابفمها وبثغره
نعم هذا الحبيب الهـيّج اعصاري
وزلازل روحي صارت من زعل مره
ذراني ابريح شوگه ومن عرفني اهواه
نيـّمني ابكهف صدره
ملاحظه هذه القصيده قديمه جدا اي عندما كنت اكتب الشعر الغزل
ومثلها يوجد الكثير*نعم للنقد نعم لكل الاراء لكن لاللغناء فانا لست مع الغناء اطلاقا*الياسري*اهديكم هذه الابيات لانكم اهل لذلك
