نار الشبت ابغداد خل تطفه....

نار الشماته واني كلي اجروح
والجرح اليخزن مابعد يشفه
جنت أستاهد عندك يصح ادواي
وتشخص المرض وتعين الوصفه
انا أتمحلج اكبالك وانت صافن ليش؟
كلبك يلعب ونيتك مختلفه
خلينا نتباصر ونطلع براي
عشرتنه على هالحال ماتصفه
انت تريد بالوزن متساوين
وبنفس القياس الثكل والخفه
هو ميزان ربك من يصير احساب
لازم بيه بالوزن ترجح كفه
بعد ماحلت لجسمه وتريد تغار
ووكت الجيل لازم بيدك الكفه
تخل نزرع ونحصد والتريده أيصير
بويه بالعباس اشبعك لمن تتكفه
عليمن هالمناحر والشتم كل يوم
وكل واحد لازم خنجره بجفه
اذا عندك بخت ماعندي صوج وياك
بس انت بصراحه تريد تتعفه
بعمرك ماكلت هذا الك كرسي وياي
وانا براس الحكم خليت الك دفه
ان جانك مسترجني مشتبه وياي
ويما جربتني وموقفي أتعرفه
اذا نفخوا بظرفك عرب ال فلان
خيرهم يفش بس يندس ظرفه
وتره محد يشيلك غيري من تطيح
ما يلحك عليك الحاير بدفه
هذا يريد منك تبغض أهل البيت
واتطول لحيتك واذيالك تكفه
حط ايدك بيدي وخل نعيش اخوان
ونار الشبت ابغداد خل تطفه
ونار الشبت ابغداد خل تطفه

سيد سعيد الصافي

هاشم نجم

نقله جميله واخيار موفق
شكرا على هذا المجهود

تحياتي

العراقي

حبيبي مصطفى العراقي 2
منور الصفحه
شكرا للمرور والرد
لك تحياتي
:66 (46)::66 (46)::66 (46):

هذا يريد منك تبغض أهل البيت
واتطول لحيتك واذيالك تكفه
حط ايدك بيدي وخل نعيش اخوان
ونار الشبت ابغداد خل تطفه

اي والله وصح السانك وبارك الله بك اخ هاشم يبعد الجبد

ههههههههه
اخي الزير
تحيه لك معطره بالورد والياسمين
هي لو تبقى علينا انا اوياك ماكو اي مشكله
لان احنا ماندور كراسي
يابعد جبدي شكرا للمرور والرد الرائع
دمت بالف خير
:66 (46)::66 (46)::66 (46)::66 (46)::66 (46):

صح لسانك عزيزي هاشم ولسان الشاعر الكبير سعيد الصافي
قصيدة جدا رائعة بمفردات اروع
سلم لنا هذا التذوق بالإختيار ولاحرمنا تميزك
تحياتي لك

منوره اختي ام فيصل
بالمرور والرد الرائع
مشكوره
ودمتي بالف خير
:66 (46)::66 (46)::66 (46)::66 (46)::66 (46):

اخي هاشم
جميل انت ومميز بمواضيعك
وتواجدك الجميل
شكرا لروعة الكلام
وتحياتي للسيد
الصافي

حبيبي ماجد شكرا للمرور والرد الجميل
لك تحياتي
:66 (46)::66 (46)::66 (46):