70 مثل عراقي من امثالنه الاصيله

السلام عليكم ورحمه الله وبركاته

اليو جبتلكم سبعين مثل من الامثال العراقيه الاصيله
اتمنى ان تستفادون منها واريد كل واحد يختار مثل
بس شرط يكول شنو مناسبته لان بصراحه اكثرهن ما اعرفهن ههههههههه

أترككم مع الامثال


1-يتعلم الحجامة بروس اليتامى
2- اطعم الحلك تستحي العين
3- يحفر البير بابرة
4- النادرة تغزل بعود والجايفة تكول الشج معووج
5- عند البطون تعمي العيون
6- سبع صنايع والبخت ضايع
7- لسان الطيب يطلع الحية من الزاغور
8- مو كل من صخم وجهة كال اني حداد
9- كلمن يحود النار لكرصتة
10- صفي النية ونام بالبرية
11- احاجيج يابنتي واسمعج ياجنتي
12- هم نزل وهم يدبج عالسطح
13- ايدة بالماعون واصابعة بالعيون
14- بيضة اليوم احسن من دجاجة باجر
15- شين التعرفة احسن من زين المتعرفة
16- تدهدر الجدر لكة قبغة
17- بير التشرب منها مي لتذب بيها حجارة
18- الما يسوكة مرضعة ضرب العصي ما ينفعة
19- الدنيا كون كلمن همة لون
20- كل لشة تتعلك من كراعها
21- كلمن ذنبة على جنبة
22- الشبعان ميدري بدرد الجوعان
23- ياحافر البير لاتغمج مسا حيها خاف الفلك يندار وانت تكع بيها
24- المبلل ميخاف من المطر
25- اللي يريد شىء يفوت شىء
26- المينوش العنب يكول حامض
27- ورة مخلص العرس اجتي الرعنة تهلهل
28- الديج الفصيح من البيضة يصيح
29- صانع الاستاذ استاذ ونص
30- لو ردت صديقك دوم حاسبة كل يوم
31- صاحب صنعة ولاصاحب قلعة
32- سد بابك امن جارك
33- طلعها من حلك السبع خشت ابطن الواوية
34- انهزم من جوة المطر وكع جوة المرزيب
35- بالوجه مراية وبالكفة سلاية
36- من السكوتي طكي وموتي ومن الورواري خلي وفوتي
37- جدرة على نارة وعينة على جارة
38- نست مرة العم جانت جنة
39- ياعجوز ما جنتي جنة
40- الشادي بعين امة غزال
41- حتى القمر بي لولة
42- ودع البزون شحمة
43- من تكثر الملاليح تغرك السفينة
44- مكدي ميحب مكدي
45- ظل البيت لمطيرة طارت بي فد طيرة
46- الميعرف تدابيرة حنطتة تاكل شعيرة
47- المفلس بالقافلة امين
48- موت يا زمال لمن يجيك الربيع
49- عيش يا كديش لمن يطلع الحشيش
50- خلي المر جوة والحلو فوك
51- غاب القط العب يا فار
52- جا يكحلها عماها
53- يشتري سمج بالشط
54- حجارة الما تعجبك تفجخك
55- ها لباب على ها الخرابة
56- ما تضيك الا تفرج
57- العاضتة الحية يخاف من مسحالها
58- كلمن دك طبلة هو كبلة
59- مو كل مدعبل جوز
60- مد رجلك على كد غطاك
61- اذا لم تستطيع ان تعض فلا تظهر اسنانك
62- لو تفك بابك وتفتخر لو تسد بابك وتنستر
63- رومانتين بفد ايد متنلزم
64- خاشوكة خاشوكة تنترس البستوكة
65- يوم كيمر وعسل يوم خبز وبصل
66- دخانك عماني وطبيخك ما جاني
67- الرحية دايرة والبركة طايرة
68- كلمن بعقلة راضي لكن برزقة لا
69- اتعب يا شجي للنايم المنتجي
70- يوم لك ويوم عليك

وتقبلوا تحياتي

امثــــــــــــــــــــال كلش حلوه ومعضمها اعرفها

بس شنو قصتها ما ادري

مشكور حيدور

الله والله حبيبي حيدوري حلوه منك
ومثل ميكولون ابو المثل ماخله شي ماكاله والامثال تضرب ولا تقاس
شكرا الك حيدوري عالموضوع الجميل
وننتظر جديدك
61- اذا لم تستطيع ان تعض فلا تظهر اسنانك
وعلى وزنه اذا كان بابك من زجاج لا ترمي الناس بالطوب
54- حجارة الما تعجبك تفجخك
على وزنه العيار الما يصيب يدوش
43- من تكثر الملاليح تغرك السفينة
على وزنه من يكثر الطباخين تحترك الكعكه
41- حتى القمر بي لولة
شنو معنى هذا المثل اول مره اسمعه؟!
32- سد بابك امن جارك
على وزنه الباب اليجيك منه الريح سده واستريح
27- ورة مخلص العرس اجتي الرعنة تهلهل
ههههههههههههههههههههههه حلوه
شكرا الك مجددا عالموضوع

يسلمو عيوني حيدر
امثال عراقية جميلة
شكرا لك
تحياتي

عاشت ايدك حيدر

امثال عراقية اصيلة

والمثل الي ماتعرف معناه بس أشــّر بصبعك وآنه بالخدمة ههههههههههههههههه

وفي مثل رقم ( 10 ) اذا سمحتلي اصححه

صفي النيــّـه ونام بالثنيــّه (( مو بالبريه ))

ومشكور عيوني

ملاك
المحاميه ام فيصل منورين الموضوع بمروركم العطر وبردودكم الاروع
وشكرا عالتصحيح ام فيصل بس هو مو معناه
اذا واحد صافي باله يكدر ينام حتر بالبر ؟؟
وتقبلوا تحياتي
ودمتم بحفظ الباري

اخي العزيز الطيب

صراحة امثااال مهمة وكثير تستعمل في حياتنا اليومية

وما شاء الله ترتيب حلوة مرتبها..

... كلمن يحود النار لكرصتة ...

ههههه هذا المثل عليه اني افسرة هذا معناه كلش واضح في عصر ما بعد الاحتلال خصوصاً...

وهو اذا انتخبت منطقة شخص وصار مسؤول حتى يكون حلقت وصل بينهم وبين الحكومة يوفرلهم غاز نفط يدير باله على منطقته وعليهم ....!!!

لا الاخ شنو يسوي يعين اخوانة ولو خلصو اخوانة راح لولد عمة ووولد ولد عمة والخياطة وابن عم الخياطة الي خيطة بدلت عرس مرته ههههه :3:

وشكرا لك اخي العزيز هاي عليه اني فسرة لك واحد :66 (46):

واذا تريد افسر لك البقية حااااضر هههه:66 (8):

وارجوا المعذرة وتقبل خالص شكري لك

الحـر

- المبلل ميخاف من المطر
61- اذا لم تستطيع ان تعض فلا تظهر اسنانك
شكرا حيدر ع الامثال العراقية


تحياتي

عزيزي ابو كرار

المعنى هو مو صفي بالك لا ... صفي نيتك ويه الناس يعني لاتظن السوء بالناس

وماراح تخاف حته لو نمت بالثنية او البرية -- يعني راح تأمن على روحك مايصير عليك شي


وتحياتي لك عزيزي

بس تصدك اجتني فكرة من وره امثالك يبو الأمثال ؟

حلو اذا نزلت موضوع تفسير الأمثال او ماذا تعني وعلى من تطلق هذه الأمثال ؟

راح يصير تفاعل حلو بالموضوع وكل عضو راح يفسر المثل من وجهة نظره -- ويكدرون الأعضاء يحطون امثال من عدهم بعد

هذا اقتراح اذا عجبكم نزلوه

شكرا حيدر على الامثال,سامعة الكثير منهن بس ماأعرف شنو المعنى.لك مني كل الود

مشكور اخي العزيز على الامثال

الامثال حلوووووة
مشكور اخي
اني سامعتهن بس لكل واحد افسره على موقف يمر بيه
تحــــــياتي

شكرا على مروركم الرائع
وعلى ردودكم الاروع
وتقبلوا تحياتي
ودمتم بحفظ الباري