صعب سرك تحطه بيد ياهو الجان واظن ابسط شروط كون تختبره
وي جيتك لو ربك يسر انسان ويا انسان هذا ال ربك يسره
والاكثر غرابه انسانه مو انسان ربك رادها وهو بالبشر ادره
نهرين التقن واثنينهن من نور النبوة والامامه وصارت الزهره
ربج صورج في اية التكوير بيج اشياء ما موجوده بالمره
صح انتي بشر من ماي وطين بس مايج زلال وطينتج حره
مايج من عصير اطيب ثمر موجود في اعلى الجنان ومن اعز شجره
بالاسراء اخذ جبريل من احلى ثمر ثمره اكل منها الرسول وصارت الزهره
صار الدين هيج وانتي بالتكوين ومن طهر الرحم مستوعبه الفكره
غيرج خلص عمره وما سجد لله وانتي وي العباده توم بالفطره
في بطن امج خديجه وجنتي اتصلين والاحشاء كلها تسبح وتقره
لان ربج يعرفج لازم اتصلين سوه الرحم معبد والبطن حضره
وجيتي تلكتج دنياج بالاحزان رغم هذا لاهله صرتي البشره
لان بيج الشفاعه التنقذ من النار واحنا بلا شفاعه اوضاعنا خطره
اذن انتي جنه لاهل الارض يا زهراء هي الارض بور ورادتج مطره
لو ما كمر وجهج مر على الافلاك حتى اهل السمه ماعرفوا الكمره
فلسفة الاشياء اسرار مكنونات وفلسفة الوجود بفاطمه الزهره
عمرج بالسنين 18 مكتوب بس بيهن شغلتي العالم باءسره
وصرتي السيد الاولى على الاطلاق لنساء العالميناشما صفن كثره
هو انتي وجودج بالنساء تكريم ما دامج قريبه لربج وامره
اذن هن قريبات ببركتج حيل وهنياله قريب لمصدر القدره
صح عمرج قليل بعرف اليحسبون بس على البشر مقياسه بعمره
علمتي بجهادج على الصلاة اجيال وعلمتي بسكوتج على الصيام وسره
وعلمتي الالم بالضلع الكسروه وعلمتي الكسر ينكسر من كسره
تحيات
هاشم نجم
