قصيدة دموع امي وعيون وطني

دموع امي وعيون وطني

لاتحجي بزمن راح ونسيناه
سولفلي متى وشلون نرتاح

كافي لخاطر الله وعوف ماجان
خليني من أمس لتعيدلي الراح

بحديقتنه الصبح ماتطلع ورود
شظايا تفتح وينطفي القداح

ونخلة بيتنه تحمل صواريخ
ويجي وكت الكصاص وتاخذ ارواح

تانينه الصدك شوطلع جذاب
شمدرينه الصدك دمعات تمساح

نزل مره الكمر وأنطعن مرتين
شيسوي! استحه ولم حاجته وراح

على شفاف الشوارع حمرة الموت
وعلى اركاب النخل سجين ذباح

كضينه الخام الأسود قطع للموت
وعلى كل باب دمعه وليل وأشباح

وكضينه الخشب من كد التوابيت
وهدلنه امتونه من شيل الالواح

أناخايف على أمي ومو على البيت
شباقي بّيتنه بس حايط وطاح

يوميه الفجر تدعي ويّ الاذان
وتسويهه صدك والكون ينزاح

من تطوي العصابه تصير بستان
وإذا تبجي الدموع تطيح تفاح

راحلها بطل ينعد بالف شاب
حمه بصدره الخيم من جتها الرماح

كفت من بجيها عليه العيون
وبقى خيط الدمع بهدومها وشاح

كلما تنسى طوله وذيج الرسوم
تذكرها الصور وشياش الرياح

وتلوليله الولد ليمت تردون
ولك يمه شعجب ماهزك صياح

تعال اكعد عروسك لازمه الباب
وكنتروك ييمه بغير مفتاح

ماعلكت رسمك عالحياطين
وسط فجات كلبي الصور ترتاح

كلما أغفه يمه وانسه الدموع
يوعيني قميصك وأشبع نياح

شسولف عن اخوي بوكفة الموت
ايتحزم للحرب بحزام فلاح

ينثرها طشش وتخضر الكاع
ويذريها العصف من غير مرواح

مواضع حدر كتره تلوذ بالخوف
ويشك أذن المدافع صوته لو صاح

وإذا رد السواتر ترجع وياه
وعلى متونه يرد العدل والطاح

لو طب معركه يكلبها صوبين
ويطك راس السلاح براس اّلسلاح

يطك راس السلاح براس الّسلاح

تحياتي لكم

حسين العراقي

الله عليك ابو علي
شعر روعه والله
تسلم وعاشت الايادي
تحياتي

تسلم ابو علي وانته دوم البادي
وكلماتك تضل تدوي بجبل وبوادي
والك الف تحيه وتصفيك الايادي
ويرجع سالم عراقي واصيح يبلادي

شكرأ على هذه القصيدة الجميلة
انها معبرة عن واقع العراقيين

الله على القصيدة اخي تسلم قصيدة جميلة جدا تحياتي

حســـــــــــ.العراقي.ــــــين
والله ما ادري شكلك كلمات روعة والله والله والله
قليلة بحقك وحق القصيدة بس ما اكلك غير شي واحد
تسلم اناملك الي كتبتها والف شكر لان انت طرزت واقع العراق الجريح
بهاي القصيدة
فالق الف شكر اخوية

وننتظر منك كل شي جديد وحلو


تحياتي


ملك الحب والرومانسية

انته السالم اخويه الغالي ronaldo


وشكرا على مرورك الكريم

تحياتي الك

حسين العراقي

اشكرك اخويه العزيز ماجد على هذا الكلام الجميل

ودائما انته كلامك جميل والله


وشكرا على مرورك اخويه الغالي


تحياتي الك


حسين العراقي

العفو اغاتي واني بالخدمة

وشكرا الك على مرورك الكريم

تحياتي الك

حسين العراقي

مشكور اخويه الغالي احباب الروح


على مرورك الكريم


تحياتي الك

حسين العراقي

مشكوووووووووووووور ابو علاوي على الشعر الجميل تحياتي