يروحي شلون شرتي الفاجد الشور
ونـتي الشور شورچ عدل وصحيح
مثل ديلاب صرتي اويه الهوه يدور
وحفنه ادنان عمري اوذرّتـه الريح
شألم منّه وعـله العاكَول مـنثور
ودمع عيني اويه دمـي
يفور ويسيح
شأحشّم آنه ميت ابـين الكَبـور
يتوسّط الشـامت حـملي ويطيح
أصَبْر الصبركَوّه وظهري مكسور
عله جروحي ارتچي والغيري ما صيح
أسهرت سود الليالي الربعي ناطور
ايتلاوه اويـه النـوايب چفي ويزيح
ولعد كل الشواطي صرت ناعـور
بس أتـرس وابدّي وحصـتي الريح
كَاعي امحلت صبخه وصبحت بور
وزرعـي فـرهدوه مـني الفلاليح
حصدتني مناجـل باشطـه تفور
وذرّتـني بـهوه عالي الـمراويح
كلتني لحم نـي الدكَت اصدور
ومـني سهم ضمت للتمـاسيـح
سفينـه وبالبحـرغطيت مجبور
يلـن كثـروا عـله ظهري الملاليح
أقـدّم للمْلاكَـه شبـور ونذور
عراق ونـار بُعدك تـجوي وتريح
أصيح دخيل عندك وانـه معذور
إلك روحي مـناره وكَلبي اضريح
دردني اردود لصبـاي وعلَي دور
بديـلاب الـهوه وحبـل المراجيح ..,
